प्रधानमंत्री आवास योजना ल गति देहे अभिनव पहल

ग्रामीण युवा मन ल राजमिस्त्री के निःशुल्क प्रशिक्षण
बलरामपुर, प्रधानमंत्री आवास योजना (ग्रामीण) ल समयबद्ध अऊ गुणवत्तापूर्ण रूप ले क्रियान्वित करे बर बलरामपुर जिला प्रशासन ह अभिनव पहल करे हे। कलेक्टर बलरामपुर-रामानुजगंज के मार्गदर्शन म जिला के ग्रामीण युवा मन ल तकनीकी प्रशिक्षण देके ओ मन ल स्वरोजगार अऊ निर्माण काम मन म दक्ष बनाए के योजना लागू करे गीस।
ग्रामीण स्व-रोजगार प्रशिक्षण संस्थान (आरसेटी) के माध्यम ले जिला के वाड्रफनगर, रामचंद्रपुर, बलरामपुर, राजपुर अऊ शंकरगढ़ जनपद पंचायत मन म कुल 5 प्रशिक्षण बैच (प्रत्येक म 35 प्रशिक्षार्थी) चालू करे गए हे। ए प्रकार ले 175 युवा मन ल 30 दिन के निःशुल्क आवासीय प्रशिक्षण के लाभ देवाए गीस। जेमां ले-आउट, नींव ले छत तक निर्माण के तकनीकी ज्ञान, निर्माण सामान के अनुपात अऊ गुणवत्ता निर्धारण, सुरक्षा मानक अऊ फील्ड प्रैक्टिकल सामिल हे।
ए पहल ले प्रधानमंत्री आवास योजना के अंतर्गत स्वीकृत घर मन के निर्माण तेज़ी अऊ गुणवत्ता के संग तेजी ले पूरा कराया जात हे। ग्रामीण युवा मन ल राजमिस्त्री के प्रशिक्षण के व्यवस्था करके स्वरोजगार के अवसर घलोक सृजित करे जात हे। एखर से स्थानीय स्तर म दक्ष श्रमिक मन के उपलब्धता बाढ़ही अऊ ग्रामीण अर्थव्यवस्था ल मजबूती मिलही।
राजमिस्त्री प्रशिक्षण कार्यक्रम बर विशेष रूप ले महिला स्व-सहायता समूह ले जुड़े महिला मन या ऊंखर परिजन, मनरेगा म 100 दिवस काम करे श्रमिक अऊ इच्छुक ग्रामीण युवा मन ल सामिल करे गीस। जिला पंचायत सीईओ बलरामपुर ह बताइस के, हमर लक्ष्य हे के सबो प्रधानमंत्री आवास समय-सीमा म अऊ गुणवत्ता के संग पूरा होही। ये प्रशिक्षण कार्यक्रम युवा मन ल अपन गांव म ही रोजगार देवाए अऊ ओ मन ल आत्मनिर्भर बनाए के दिशा म घलोक बड़का कदम हे।
जिला प्रशासन ह जादा ले जादा युवा मन ले अपील करे हे के ओ मन ए प्रशिक्षण के लाभ उठाके नवा कौशल सीखंय, अउ जिला के विकास म घलोक योगदान देवंय। इच्छुक उम्मीदवार अपन ग्राम पंचायत, जनपद पंचायत अथवा सीधा ग्रामीण स्व-रोजगार प्रशिक्षण संस्थान बलरामपुर ले संपर्क कर सकत हें।