इको-कॉर्डियोग्राफी अऊ ब्लड बैंक सुविधा के घलोक शुरूआत
रायपुर, सुपरस्पेश्लिस्ट डाक्टर मन कोति ले इलाज के सुविधा रायपुर जिला अस्पताल म शुरू कर दिए गए हे। एखर बर निजी अस्पताल मन के विशेषज्ञ डॉक्टर मन के सेवा लेहे जात हे। पंडरी स्थित रायपुर जिला अस्पताल म सुपरस्पेश्लिस्ट ओपीडी सेवा के पहिली दिन 1 जनवरी के चार खांटी जानकार मन ह मरीज मन के इलाज करिन। इहां इको-कॉर्डियोग्राफी अऊ ब्लड बैंक सुविधा घलोक 1 जनवरी ले चालू हो गए हे।
विशेषज्ञ ओपीडी सेवा के पहिली दिन ए.सी.आई. (Advanced Cardiac Institute) के प्रभारी डॉ. स्मित श्रीवास्तव ह दू मरीज मन के इको करके उपचार करिन अउ जरूरी परामर्श दीन। रामकृष्ण केयर अस्पताल के न्यूरोलॉजिस्ट डॉ. राहुल पाठक, नेफ्रोलॉजिस्ट डॉ. प्रभात चौधरी अऊ वी.वाई. अस्पताल के अस्थिरोग विशेषज्ञ डॉ. श्रीधर राव ह घलोक मनखे मन ल निःशुल्क विशेषज्ञ ओपीडी सेवा प्रदान करिन।
हम आप ल बता देवन के स्वास्थ्य मंत्री श्री टी.एस. सिंहदेव ह शासकीय अस्पताल मन म सुपरस्पेशियालिटी इलाज उपलब्ध कराए बर निजी क्षेत्र के खांटी जानकार के सेवा लेहे के निर्देश दिए रहिन। उंखर पहल म रायपुर जिला अस्पताल म ये सुविधा शुरू कर दिए गए हे। जल्दीच दूसर विभाग मन के खांटी जानकार के घलोक नियमित सेवा इहां शुरू हो जाही। विभाग अऊ दिनवार रोस्टर बनाके जिला अस्पताल म बिहनिया 10 बजे ले 12 बजे तक मरीज मन ल नि-शुल्क विशेषज्ञ ओपीडी सेवा उपलब्ध कराए जाही।
