- हर जिला म परीक्षार्थी मन के संख्या के आधार म करे जाय बस, मिनी बस, जीप के व्यवस्था
- सबो जिला मन म व्यवस्था बर नियुक्त करे जाए नोडल अधिकारी
- परीक्षार्थी नोडल अधिकारी मन के मोबाईल नंबर म करा सकही अपन रजिस्ट्रेशन
- छात्रा मन के संग ऊंखर एक अभिभावक ल होही यात्रा के अनुमति
- वाहन म यात्रा बर एडमिट कार्ड देखाय म मिलही अनुमति
रायपुर, 30 अगस्त 2020। मुख्यमंत्री श्री भूपेश बघेल ह सबो जिला कलेक्टर मन ल राष्ट्रीय स्तर म आयोजित होवइया प्रवेश परीक्षा जइसे आईआईटी जेईई (JEE) अऊ नीट (NEET) परीक्षा के परीक्षार्थी मन ल ऊंखर परीक्षा केन्द्र तक लाय अऊ उंखर वापसी बर निःशुल्क परिवहन के व्यवस्था के हुकुम देहे हें। उमन जिला कलेक्टर मन ल जारी हुकुम म कहे हें के परीक्षा म सामिल होवइया परीक्षार्थी मन के संख्या के आधार म जरूरत के मुताबिक बस, मिनीबस, जीप आदि वाहन के व्यवस्था ठउका करे जाय। उमन सबो जिला कलेक्टर मन ल एखर बर जिला नोडल अधिकारी नियुक्त करे अऊ क्षेत्रीय परिवहन कार्यालय (आरटीओ) अऊ जिला परिवहन कार्यालय (डीटीओ) ले ये संबंध म समन्वय करे के निर्देश देहे हें।
मुख्यमंत्री ह कलेक्टर मन ल जारी निर्देश म कहे हें के लॉकडाउन के सेती बस सेवा संचालित नइ होवत हे। जेखर सेती बस ऑपरेटर मन ले तुरंते बस के व्यवस्था कराए जाय। आईआईटी जेईई (JEE) परीक्षा 1 सितम्बर ले आयोजित होवत हे, ए खातिर परीक्षार्थी मन बर बस 31 अगस्त ले चलाना होही। राज्य म करीबन 13 हजार 500 परीक्षार्थी ये परीक्षा म सामिल होहीं। प्रदेश म ये परीक्षा बर 5 केन्द्र बनाय गए हे। श्री बघेल ह निर्देश म हे हें के कई परीक्षार्थी खुद के व्यवस्था ले परीक्षा देहे जात होहीं, फेर आन परीक्षार्थी मन बर प्रशासन कोति ले व्यवस्था करे जाही। परीक्षा म सामिल होवत छात्रा मन के संग ऊंखर एक अभिभावक ल घलोक यात्रा के अनुमति होही, यात्रा निःशुल्क होही अऊ एखर बर कोनो राशि नइ लेहे जाए। एकर व्यय राज्य शासन ह वहन करही।
परिवहन वाहन म फिजिकल डिस्टेंसिंग के पालन अनिवार्य रूप ले करे जाए। परीक्षार्थी मन ल वाहन म यात्रा बर अपन एंन्ट्रेंस एक्जाम के प्रवेश पत्र (एडमिट कार्ड) देखाना भर परही। प्रवेश पत्र देखाय म परीक्षार्थी मन ल वाहन म यात्रा के अनुमति देहे जाय। मुख्यमंत्री ह जिला कलेक्टर मन ल परिवहन व्यवस्था बर नियुक्त करे गए स्थानीय अधिकारी मन के मोबाईल नंबर के प्रचार-प्रसार मीडिया म तुरंते करे के निर्देश देहे हें, जेखर से परीक्षार्थी परीक्षा केन्द्र मन तक जाय अऊ वापस आए बर अपन रजिस्ट्रेशन करा सकयं। जारी निर्देश म ये घलोक कहे गए हे के परीक्षार्थी मन के संख्या कम होए म जीप अऊ मिनी वेन जइसे वाहन के घलोक व्यवस्था करे जा सकत हे।
