आज हर महिला ल रानी लक्ष्मीबाई बने के जरूरत हे: राज्यपाल सुश्री उइके

रायपुर, 13 अगस्त 2021। आज के परिवेश म हर महिला ल सशक्त होए के जरूरत हे। कहूं कोनो महिला ल वोखर अधिकार के नइ मिलत हे त एकर कारण ओमां आत्मविश्वास के कमी हो सकत हे। आज हर महिला ल रानी लक्ष्मीबाई बने के जरूरत हे। ओ मन ल चाही दूसर महिला के संग अत्याचार होवत हे त ओला रोकयं अऊ ओखर मदद करयं अऊ आत्मविश्वास बनाए रखयं। ये बात राज्यपाल सुश्री अनुसुईया उइके ह हेमचंद यादव विश्वविद्यालय कोति ले आयोजित भारतीय स्वतंत्रता आंदोलन म महिला मन के भूमिका विसय उपर आधारित वेबीनार ल संबोधित करत कहत रहिन। राज्यपाल ह ऑनलाइन प्रतियोगिता म सामिल भाग लेवईया मन ल बधाई दीन।
राज्यपाल ह कहिन कि आजादी के 75 साल के अवसर म अमृत महोत्सव मनाए जात हे। हमर स्वतंत्रता संग्राम म बहुत अकन मनखे मन ह योगदान देहे हें। ये मां ले बहुत अकन के नाम हम जानथन, फेर कई झन अइसे हे जेन गुमनामी म खो गे हें। हमर शिक्षा प्रणाली म अइसन महानायक मन के उल्लेख बहुत कम मिलथे। नवा पीढ़ी ल अइसन महानायक मन के जानकारी मिलय, ए खातिर प्रधानमंत्री श्री नरेन्द्र मोदी ह अइसन महानायक मन ल सुरता करे के उद्देश्य ले अमृत महोत्सव के रूप म मनाए के निर्णय लेहे हे।
राज्यपाल ह कहिन कि आजादी के ये लड़ाई म पुरूष अउर महिला ह संघरा रूप ले योगदान देहे हें। रानी लक्ष्मीबाई, रानी दुर्गावती, सरोजनी नायडु, सूचेता कृपलानी जइसे बहुत अकन नाम हे जेमन आजादी के लड़ाई म अपन योगदान देहे हें। राज्यपाल ह कहिन कि ओ समय महिला मन के स्थिति अपेक्षाकृत जागरूकता कम रहिस, तभो ओमां अतका जज्बा रहिस कि उमन स्वतंत्रता संग्राम म बढ़-चढ़ कर हिस्सा लीन।
उमन ह कहिन कि सन् 1857 के विद्रोह भारतीय स्वतंत्रता संग्राम वो घटना रहिस जेकर नायक एक नारी रहिस, ओ नारी के प्रशंसा अंग्रेज घलोक करत रहिन। लक्ष्मीबाई के नेतृत्व क्षमता ल देखके अंग्रेज सेनापति ह कहे रहिस कि ये महिला बहुत बहादुर अऊ सर्वश्रेष्ठ हे। बेगम हजरत महल के सैनिक दल म सामिल महादेवी ह अकेला बत्तीस अंग्रेज सैनिक मन ल मार गिराए रहिस।
राज्यपाल ह कहिन कि छत्तीसगढ़ के महिला मन घलोक त्याग अऊ बलिदान बर जाने जाथें। सन् 1920 म महात्मा गांधी के रायपुर प्रवास म ऊंखर कोति ले करे गए दान के अपील ले प्रभावित होके महिला मन ह अपन गहना, कपड़ा अऊ नगद राशि बड़ मात्रा म दान करे रहिन। गांधी जी के प्रभाव म महिला मन गांव-गांव म स्वतंत्रता आन्दोलन के प्रचार करे रहिन। सुश्री उइके ह कहिन कि महात्मा गांधी ह कहे रहिन कि जब कभू भारतीय स्वतंत्रता संग्राम के इतिहास लिखे जाही। भारतीय महिला मन के त्याग ल जादा स्थान प्राप्त होही। बहुत अकन अइसे महिला मन हे जिंकर भारतीय स्वतंत्रता आन्दोलन म महत्वपूर्ण योगदान हे। हमला उंकर से प्रेरणा लेना चाही।