समोसा दुकान बंद होए म रितिक अऊ रमेश हाथ ठेला ले बेचत हें साग-भाजी
रायपुर, 31 मार्च 2020। लॉक डाउन के बेरा म मनखे मन ल जरूरी जिनिस के संगेच फल अउ साग-भाजी घलोक आसानी ले मिलत हे। छत्तीसगढ़ म मुख्यमंत्री श्री भूपेश बघेल के कुशल नेतृत्व म कोरोना महामारी के रोकथाम बर बहुत अकन उपाय करे जात हे। एखरे संगेच लॉक डाउन के बेरा म आम नागरिक मन ल राजमर्रा के जिनिस के समस्या झन होवय एकर घलोक ध्यान रखे गए हे। मुख्यमंत्री फीडबेक के आधार म मनखे मन के समस्या मन ल जाने समझे के बाद समस्या मन के समाधान बर बेरा-बेरा म जिला प्रशासन अऊ पुलिस प्रशासन ल हुकुम देहे जात हे। मुख्यमंत्री ह व्यापारी अऊ स्वंयंसेवी संस्था मन ले घलोक संकट के ये घड़ी म सहयोग के अपील करे हें।
रायपुर शहर के आऊटर अउ दूरिहा के कालोनी मन तक हाथ ठेला ले ताजा फल अऊ साग-भाजी पहुंचत हे। बड़े आबादी वाले कबीर नगर कालोनी म भिनसरहा 7 बजे ले मंझनिहा 12 तक फल अऊ साग-भाजी ठेला के माध्यम ले अवाज लगाके बेचे जात हे। आज बिहनिया 11 बजे दू लइका रमेश अऊ रितिक साकेत ह सब्जी लेके कॉलोनी के गली मन म अवाज लगा के सब्जी बेचिन। पूछे म उमन बताइन के ओ मन रीवा मध्यप्रदेश के रहइया यें। कबीर नगर म आदर्श चौक तीर किराया के मकान म रहिथें। उंकर मन के पहिली समोसा के दुकान रहिस। कोरोना बीमारी के चलते लॉक डाउन के सेती समोसा दुकान बंद हो गे, ए खातिर पाछू 5 दिन ले उमन हाथ ठेला म सब्जी बेचे के धंधा कालोनी मन म जा-जाके करत हें, एखर से उंखर रोजी-रोटी निकल जात हे अऊ मनखे मन ल घर पहुंच सेवा घलोक मिलत हे। पूछे म उमन साग-भाजी के रेट के बारे म बताइन के करेला 30 रूपिया किलो, भाटा 20 रूपिया किलो, गोभी 30 रुपए किलो, लौकी 20 रूपिया किलो, शिमला मिर्च 20 ले 30 रुपए किलो, भिंडी 30 रुपए किलो, टमाटर 20 रूपिया किलो,पत्तागोभी 20 रूपिया किलो अऊ चौलाई भाजी 30 रूपिया किलो के दर ले बेचत हें।
