समर्थन मूल्य ले आत्मनिर्भरता तक: किसान हंसराज साहू के मेहनत ह बदलिस रफ्तार ई-स्कूटी बनिस समृद्धि के चिन्हारी

धमतरी, छत्तीसगढ़ सरकार के किसान हितैषी नीति मन आज गांव-गांव म खुशहाली अउ आत्मनिर्भरता के मजबूत नींव बनत हे। समर्थन मूल्य म धान खरीदी के साफ-सुथरा बेवस्था ह किसान मन के जिनगी म बने बदलाव लाय हे। अइसने एक प्रेरक कहानी धमतरी जिला के ग्राम बोड़रा के किसान श्री हंसराज साहू के हे। जेमन सरकार के योजना के लाभ उठाके न सिरिफ अपन आर्थिक स्थिति मजबूत करिन, भलुक आधुनिक सुविधा मन ल घलो अपनाइन।
श्री हंसराज साहू बताथें के उमन पाछू खरीफ सीजन म संबलपुर सहकारी समिति म समर्थन मूल्य म धान बेचिन। धान बेचे ले मिले पइसा ले उमन एक ठन ई-स्कूटी बिसाइन, जेन आज उंकर बर सुविधा, समय के बचत अउ आत्मनिर्भरता के चिन्हारी बन गे हे। “साँय-साँय” दउंड़त ई-स्कूटी ले अब उनला धमतरी शहर, खेत-खार, रिस्तेदार मन के घर अउ रोज के काम बर आये-जाये म बड़ सुभीता होवत हे। एकर ले न सिरिफ ईंधन के खर्चा कम होइस हे, भलुक समय के घलो भारी बचत होवत हे।
श्री साहू करा कुल 2 एकड़ 25 डिस्मिल खेती जमीन हे, जेमा वो पुराना अनुभव अउ आधुनिक खेती के समझ के संग धान के खेती करथें। ए साल उमन समर्थन मूल्य म कुल 46 क्विंटल 40 किलो धान बेचे हें। समय म भुगतान अउ साफ प्रक्रिया ले वो बहुत खुस हें। उमन बताइन के ए साल धान बेचे ले मिले राशि के उपयोग वो अपन बेटा के बिहाव जइसे जरूरी पारिवारिक काम म करहीं, जेकर ले पूरा परिवार म खुसी के माहौल हे।
श्री हंसराज साहू ह मुख्यमंत्री श्री विष्णु देव साय के आभार मानत कहिन के “तुंहर टोकन” मोबाइल ऐप ह धान बेचे के प्रक्रिया ल एकदम सरल, पारदर्शी अउ किसान-अनुकूल बना दे हे। पंजीयन ले लेके बेचे तक अब किसान मन ल कोनो किसम के फालतू परेशानी नइ होवय।
किसान हंसराज साहू के ए सफलता के कहानी ए बात के पक्का सबूत हे के सरकार के दूरदर्शी नीति अउ डिजिटल नवाचार जब जमीन म सही ढंग ले लागू होथे, त किसान सशक्त बनथे अउ उंकर जीवन स्तर लगातार ऊंचाइ डहार बढ़थे। ए कहानी प्रदेश के आन किसान मन बर घलो प्रेरणा हे के वो सरकारी योजना मन के जादा ले जादा लाभ लेके समृद्धि के रद्दा म आगू बढ़ंय।