रायपुर, 1 सितंबर 2020। कोरोना संक्रमण के चलत ठप पड़े बस सेवा फेर ले शुरु होय बर जावत हे। 3 सितंबर ले अब बस मन वापस सड़क म दौड़त नजर आही। परिवहन मंत्री मोहम्मद अकबर के संग बस ऑपरेटर मन के प्रतिनिधिमंडल के बैठक के बाद एखर उपर सहमति बनिस।
बताये जावत हे कि बैठक म बस ऑपरेटर मन के मांग उपर चर्चा होइस। जेमा सरकार के डाहर ले बस ऑपरेटर मन ल बड़का राहत देवत हुए 2 महीना के टैक्स छूट देहे गे हे. एखर संग ही आने मांग मन उपर घलो सहमति बने हे, जल्द ही आने मांग मन ल लेके एक घाव फेर बैठक होही, जेमा सबो मांग मन उपर विस्तार ले चर्चा के बाद ओखर उपर फैसला लेहे जाही।
बस ऑपरेटर संघ के प्रदेश उपाध्यक्ष अनवर अली ह बताइस कि प्रदेश म बस ऑपरेटर मन के सबले अहम मांग यात्री किराया बढ़ाये ल लेके रिहिस. डीजल के बढ़त दाम के बीच ऑपरेटर मन ह यात्री किराया ल बढ़ाये के मांग करे रिहिस. जेखर उपर परिवहन मंत्री ह कैबिनेट म चर्चा करे जाये के आश्वासन ऑपरेटर मन ल देहे हे। एखर अलावा आने मांग मन उपर घलो जल्द फैसला होही।
