कोरोना काल म जब मनखे मन के रोजगार छूटत हे, उंहे प्रदेश म शुरू होईस एक नवा फैक्टरी, स्थानीय मनखे मन ल मिलीस रोजगार: श्री भूपेश बघेल
रायपुर, 9 जून 2020/ मुख्यमंत्री श्री भूपेश बघेल ह आज इहां अपन निवास कार्यालय ले वीडियो कॉन्फ्रेंसिंग के माध्यम ले छत्तीसगढ़ म निजी क्षेत्र के पहली फ्रोजन फूड इकाई ’गोल्ड’ के शुभारंभ करिन। ये इकाई रायपुर के उरला क्षेत्र के बोरझरा म स्थित हे। गोयल ग्रुप कोति ले चालू करे गए ए इकाई म शाकाहारी फूड प्रोडक्ट तैयार करे जात हे।
मुख्यमंत्री ह ए अवसर म कहिन के कोरोना काल म जब मनखे मन के रोजगार छूटत हे, तौने समे प्रदेश म एक नवा फैक्टरी शुरू होए हे, जेमां स्थानीय मनखे मन ल रोजगार मिले हे। श्री बघेल ह ए अवसर म गोयल ग्रुप ऑफ कंपनीज के चेयरमैन श्री सुरेश गोयल संग ग्रुप ले जुड़े सबो मनखे मन ल बधाई अऊ शुभकामना दीन। मुख्यमंत्री ह कहिन के जब ए फैक्ट्री के उत्पाद मन के छत्तीसगढ़ म अऊ छत्तीसगढ़ के बाहिर देश-विदेश के मनखे मन उपयोग करहीं त ओ मन ल छत्तीसगढ़ के माटी के सोंधी महक के अहसास होए लगही।
मुख्यमंत्री श्री बघेल वीडियो कॉन्फ्रेंसिंग के माध्यम ले बोरझरा स्थित ए इकाई म उपस्थित मनखे मन ले रूबरू होइन, जहां गोयल ग्रुप ऑफ कंपनीज के चेयरमैन श्री सुरेश गोयल, विधायक श्री सत्यनारायण शर्मा संग ग्रुप के सदस्य अऊ कर्मि मन ले बातचीत करिन। मुख्यमंत्री ह फैक्ट्री म काम करत लक्ष्मी निषाद अऊ भूमिका ठाकुर ले बात करिन। उमन मुख्यमंत्री ल बताइन के कोरोना काल म ओ मन ल अपन गांव तीर ही काम मिले हे, जेखर से काफी राहत मिलीस हे।
गोयल समूह के मैनेजिंग डायरेक्टर श्री नरेन्द्र गोयल ह बताइस के ये छत्तीसगढ़ के पहला फ्रोजन फूड उद्योग हे। एखर खाद्य उत्पाद शत प्रतिशत शुद्ध अऊ शाकाहारी हे। ये मां शाकाहारी उपभोक्ता मन ल नवा विकल्प मिले लागहि। संगेच ए उत्पाद ल बनाए म कोनो प्रकार के प्रिजरवेटिव केमिकल अउ आर्टिफिशियल कलर के उपयोग नइ करे गए हे । उमन बताइस के जहां ए उद्योग म 60 प्रतिशत महिला मन ल रोजगार दे गए हे उंहे काम-काज के सुचारू संचालन बर उंखर स्वच्छता अउ सुरक्षा आदि बर बहुत प्रबंध करे गए हे। इहां कार्यरत मनखे मन बर सेनेटाईजर, मास्क के व्यवस्था के संग ओ मन ल फिजिकल डिस्टेंसिंग के पालन कराए जात हे।
गोयल ग्रुप के डायरेक्टर श्री नरेन्द्र गोयल अऊ श्री संदीप गोयल ए अवसर म मुख्यमंत्री निवास म उपस्थित रहिन। मुख्यमंत्री ह फैक्ट्री के उत्पाद लांच करिन अऊ ब्रोशर के विमोचन करिन। ए फ्रोजन फूड इकाई म आलू पराठा, लहसुन-चीज नान, वेज सीक कबाब, पपीता हलवा अऊ सेवई खीर संग कई उत्पाद तैयार करे जात हे।