जशपुर, 13 जुलाई 2020। छत्तीसगढ़ के गाव मन म स्वच्छ भारत मिशन योजना के तहत गोबर गैस संयंत्र स्थापित करे जात हे। गोबर गैस सयंत्र के स्थापना के मुख्य उद्देश्य मनखे मन ल प्रदूषण रहित ईधन उपलब्ध कराना अउ सयंत्र ले निकलइया अपशिष्ट के उपयोग करके जैविक खाद के निर्माण करना हे। ग्रामीण क्षेत्र मन म मवेशि मन ले जऊन गोबर इकट्ठा होथे ओखर उपयोग गोबर गैस संयंत्र बर अउ खाद निर्माण बर करे जात हे।
जशपुर जिला के जनपद पंचायत मनोरा के दूरस्थ आदिवासी बाहुल्य क्षेत्र के ग्राम पंचायत सुरजुला म बायोगैस प्लांट के स्थापना करे गए हे। बायोगैस प्लांट के स्थापना ले ग्रामीण अंचल म निवासरत महिला अऊ परिवार के सदस्य मन म खुशी के महौल हे। ग्राम पंचायत सुरजुला निवासी श्रीमती जीवन्ती तिर्की ह बताइस के बायो गैस प्लांट के स्थापना ले वोखर घर म ईंधन के समस्या दूर हो गीस। अब आसानी ले गैस मिल जाथे। एखर से वोखर एक बड़का समस्या के समाधान हो गए हे अऊ गैस सिलेण्डर म गैस भराए के जरूरत नइ हे। गोबर गैस सयंत्र बर गोबर के पूर्ति घर के गाय, भैस के गोबर ले आसानी ले हो जात हे। रोजेच 150 किलोग्राम गोबर ले करीबन दिनभर के जरूरत बर ईंधन प्राप्त हो जाथे। श्रीमती जीवन्ती ह बताइस के गोबर गैस के उपयोग बहुतेच सरल अउ सस्ता हे। भिनसरहा अपन घर ले निकले गोबर ल प्लांट म घोलके डालना हे अऊ खाना बनाए बर गैस मिल जाथे। वो ह बताइस के गोबर गैस के उपयोग हमार पर्यावरण ल स्वच्छ रखे अऊ पशुपालन ल बढ़ावा देहे के दिशा म एक बड़का कदम हो सकत हे।
जशपुर जिला के ग्राम सुरजुला म जीवन्ती तिर्की, रम्थु राम, अरबिस टोप्पो, संतुराम, रामजी, असारू, दिलबहाल अउ प्रदीप मिंज के घर मन म गोबर गैस संयंत्र ले गैस कनेक्शन लगाइए गए हे। ये सबो गांववासी अपन घर म रसोई बर गोबर गैस के उपयोग करत हें। इही गांव के श्री राजेश ह बताइस के गोबर गैस सयंत्र के स्थापना ग्रामीण क्षेत्र मन म आजीविका के साधन विकसित करे के अच्छा विकल्प बने लगे हे। स्वच्छ भारत मिशन के तहत जशपुर जिला के 65 ग्राम पंचायत मन म गोबर गैस सयंत्र स्थापित करे के लक्ष्य रखे गए हे। अभी हाल म 16 पंचायत मन म गोबर गैस सयंत्र निर्माण प्रगतिरत हे।