विश्व प्रसिद्ध बस्तर दशहरा म फुलरथ के पहली परिक्रमा होइस पूरा

रायपुर, 19 अक्टूबर 2020। विश्व प्रसिद्ध बस्तर दशहरा के प्रमुख आकर्षण फुलरथ के पहली परिक्रमा रविवार के पूरा होइस। फूल मन ले सजे आठ चक्का के ये रथ ल लेके जगदलपुर अऊ तोकापाल तहसील के 36 गांव मन ले पहुंचे लगभग 400 ग्रामीण ह खींच के गोलबाजार के परिक्रमा करिन।

उल्लेखनीय हे कि काकतीय नरेश पुरुषोत्तम देव ह एक बार श्री जगन्नाथपुरी तक पैदल तीर्थयात्रा करके मंदिर म स्वर्ण मुद्रा अऊ स्वर्ण भूषण आदि सामग्री भेंट म अर्पित करे रिहिन। इहाँ राजा पुरुषोत्तम देव ल रथपति के उपाधि ले विभूषित करे गिन। जब राजा पुरुषोत्तम देव पुरी धाम ले बस्तर लहुटिस तब ओमन धूम-धाम ले दशहरा उत्सव मनाए के परंपरा के शुभारम्भ करिन अऊ तब ले गोंचा अऊ दशहरा पर्व म रथ चलाए के प्रथा हे।

बस्तर दशहरा म शारदीय नवरात्रि के द्वितीया तिथि ले सप्तमी तिथि तक फुलरथ ल खींचे बर हर साल बड़का संख्या म जगदलपुर अऊ तोकापाल तहसील के 36 गाँव मन के ग्रामीण इहाँ पहुंचथे। ए साल कोरोना के संक्रमण ल देखत हुए बस्तर दशहरा समिति अऊ जिला प्रशासन द्वारा पूरा सावधानी के संग ए रस्म ल मनाए के निर्णय लेहे गे हे अऊ लगभग 400 स्वस्थ युवा मन ल ही ए रस्म म भागीदारी निभाए के जिम्मेदारी देहे गिस हे। ए सबो युवा मन ल पहली ले ही क्वारन्टीन म रखे के संग ही कोरोना जांच घलो करे गे हे, ताकि संक्रमण के कोनो भी संभावना ल खत्म करे जा सके।