- किसान मन ले पूछिन कोनो दिक्कत तो नइ हे, किसान मन कहिन, व्यवस्था ले पूरा संतुष्ट हें
- लइका के मासूमियत देख अपन ल रोक नइ पाए अऊ मुख्यमंत्री ह चलाय भौंरा
रायपुर, मुख्यमंत्री श्री भूपेश बघेल आज दुर्ग जिला के अंतर्गत पाटन क्षेत्र के दौरा के बेरा म धान बिसई ठीहा सेलूद के जांच म पहुंचिन। उमन उहां धान बेचे आए किसान मन ले चर्चा करिन। किसान मन ह बताइन कि धान म मौसम के सेती थोकन नमी आ गए हे। किसान मन ह बताइन कि अभी-अभी सबो किसान मन के धान के तौलाई होइस हे। सबो किसान धान खरीदी ले पूरा संतुष्ट हें। जऊन तारीक के टोकन जारी होइस, उही तारीक म खरीदी हो गीस। सबो किसान ये पइत खरीदी ले संतुष्ट हें। उमन हमाल मन ले घलोक बातचीत करिन। हमाल मन ह बताइन कि वो मन कोंडागांव ले आए हें। मुख्यमंत्री ह अधिकारी मन ले कहिन कि अइसन व्यवस्था आगू घलोक रखव। किसान मन ल अगोरे ल झन परय, समय म खरीदी हो जाए। अधिकारी मन धान बिसई ठीहा मन म व्यवस्था के मॉनिटरिंग घलोक करत रहव। मुख्यमंत्री ह धान के गुणवत्ता घलोक परखिन अऊ किसान मन ले ये संबंध म बातचीत घलोक करिन।
मुख्यमंत्री ह धान खरीदी केंद्र म एक लइका ल अपन परिजन के संग देखिन, जेखर हाथ म एक भौंरा रहिस। मुख्यमंत्री ओखर मासूमियत देखके अपन ल रोक नइ पाइन अऊ ओखर से पूछिन कि का मोला अपन भौंरा चलाय देबे? लइका ह खुशी ले भौंरा दे दीस। फेर मुख्यमंत्री ह खुशी-खुशी भौंरा चलाइन अऊ लइका के पीठ थप-थपाके कहिन आज अचानक भौंरा चलाय के मौका पाके मोर बचपन के याद ताजा हो गीस।