रायपुर, मुख्यमंत्री श्री भूपेश बघेल अऊ केन्द्रीय सड़क परिवहन अउ राजमार्ग मंत्री श्री नितिन गडकरी ह आज छत्तीसगढ़ म 9240 करोड़ रूपिया लागत के कुल 1017 किलोमीटर लम्बाई के 33 सड़क परियोजना मन के लोकार्पण अउ शिलान्यास करिन। ये समारोह राजधानी रायपुर के पंडित जवाहरलाल नेहरू मेमोरियल मेडिकल कॉलेज म सड़क परिवहन अउ राजमार्ग मंत्रालय भारत सरकार अऊ भारतीय राष्ट्रीय राजमार्ग प्राधिकरण कोति ले आयोजित करे गीस।
ए सड़क मन के बने ले छत्तीसगढ़ के पड़ोसी राज्य उड़ीसा, महाराष्ट्र, मध्यप्रदेश, झारखंड, उत्तर प्रदेश ले कनेक्टिविटी जादा अच्छा हो जाही। प्रदेश के पिछड़ा क्षेत्र बर सुचारू रोड नेटवर्क विकसित होही। एखर से ईंधन, यात्रा समय, दूरी अऊ कुल परिवहन लागत म बचत होही। मुख्यमंत्री श्री भूपेश बघेल ह समारोह म केन्द्रीय मंत्री श्री गडकरी ले छत्तीसगढ़ के कई ठन सड़क परियोजना मन के स्वीकृति देहे के आग्रह करिन। जेन म श्री गडकरी ह अधिकांश परियोजना मन ल स्वीकृति देहे के आश्वासन दीन। मुख्यमंत्री श्री बघेल ह छत्तीसगढ़ के सड़क परियोजना मन ल सहृदयता पूर्वक स्वीकृति प्रदान करे बर श्री नितिन गडकरी के प्रति आभार प्रकट करिन।
मुख्यमंत्री श्री बघेल के आग्रह म केन्द्रीय मंत्री श्री गडकरी ह छत्तीसगढ़ ल आरओबी बर 700 करोड़ रूपिया देहे के करिन घोषणा
