जांजगीर-चांपा, 18 नवम्बर 2020। छत्तीसगढ़ सरकार कोति ले किसान मन के बेहतरी बर उठाए गए कदम ले किसान मन के चेहरा म खुशहाली नजर आवत हे। छत्तीसगढ़ के ऐतिहासिक अऊ सांस्कृतिक विरासत ल सहेजत मुख्यमंत्री श्री भुपेश बघेल ह जमीनी हकीकत उपर केन्द्रित विकास के छत्तीसगढ़ी माडल विकसित करिस, जेखर केन्द्र म किसान, अनुसूचित जनजाति, अनुसूचित जाति, पिछड़ा वर्ग अऊ जरूरतमंद मनखे हे। उमन गढ़बो नवा छत्तीसगढ़ के नारा दीन। अपन छत्तीसगढ़ी माडल उपर छत्तीसगढ़ के चार चिन्हारी नरवा, गरुवा, घुरुवा, बाड़ी के विकास ल किसान मन के आर्थिक समृद्धि के माध्यम बनाए हे।
मुख्यमंत्री श्री बघेल ग्रामीण परिवेश म पले बढ़े हें ते खातिर ओ मन ग्रामीण अर्थव्यवस्था के नारी ल टमड़ डरे हें। किसान मन के कठिना, उंखर जरूरत अऊ खेती-किसानी के ओ मन ल गहिर जानकारी हे। ओ मन गांव के सामाजिक आर्थिक स्थिति अऊ उहां के जनजीवन ल घलोक बने सहिन जानथें। उमन मुख्यमंत्री बनतेच सबले पहिली गांव, किसान अऊ मजदूर कोति ध्यान दीन। उमन जमीनी हकीकत उपर आधारित बहुत अकन व्यावहारिक योजना मन ल शुरू करिन, जेकर फल दिखे लगे हे।
राजीव गांधी किसान न्याय योजना – किसान मन ल मिलीस 2500 रूपिया प्रति कुंटल धान के कीमत-
राज्य सरकार ह किसान मन के आर्थिक स्थिति सुधारे बर 25 सौ रूपिया धान के कीमत दीस, करजा माफी अऊ सिंचाई कर माफ कर दीस। एखर चलते खेती ले दुरिहा गए मनखे मन ह फेर खेती कोति रूख करिन। एकर लाभ खरीफ विपणन साल 2019-20 म जांजगीर चांपा जिला के 1लाख 69 हजार 46 किसान मन ल मिलीस। धान के समर्थन मूल्य 1815 रूपिया प्रति कुंटल के दर ले भुगतान करे गीस। किसान मन ल 2500 रूपिया प्रति कुंटल के दर ले लाभ देवाए बर बांचे राशि के राजीव गांधी किसान न्याय योजना के माध्यम ले 4 किश्त म 5,38,87,52,369 रूपिया के भुगतान करे जात हे। जेखर तीन किश्त के लाभ किसान मन ल मिल गए हे। न्याय योजना ले किसान मन म आए समृद्धि ले ओ मन अपन कृषि काम के विस्तार करत हे। किसान मन के परिवार मन म खुशी के माहौल हे। कोरोना संक्रमण काल म घलोक किसान मन ल कोनो प्रकार के आर्थिक दिक्कत के सामना करना नइ परे हे।
गोधन न्याय योजना – पशुपालक किसान मन ल मिलीस – 22,61,81,172 रूपिया गोबर के कीमत
राज्य सरकार कोति ले ग्रामीण अर्थव्यवस्था ल सुधारे बर सुराजी गांव योजना लागू करे गए हे। देश दुनियां म पहली पइत गोबर के खरीदी बर गोधन न्याय योजना छत्तीसगढ़ के सरकार ह शुरू करिस। सरकार के ये साहसिक कदम ह पशुपालक मन ल आर्थिक संबल दीस। गांव मन म गौठान अऊ रोका – छेका के व्यवस्था ह दुसर अऊ तीसर फसल के रद्दा खोल दीन। गोधन न्याय योजना के माध्यम ले जिला के 240 गौठान मन के माध्यम ले गोबर खरीदी करे जात हे। पाछू 31 अकटूबर तक 1,13,09,086 किलो गोबर के खरीदी करे गए हे। पशुपालक किसान मन ल 22,61,81,172 रूपिया के भुगतान करे जा चुके हे।
