नई दिल्‍ली : छत्तीसगढ़ पवेलियन म दिखत हे ‘गढ़बो नवा छत्तीसगढ़’ के झलक

नई दिल्‍ली, दिल्ली के प्रगति मैदान म आयोजित अंतर्राष्ट्रीय व्यापार मेला म लगाए गए छत्तीसगढ़ पवेलियन अभी हाल म देश अऊ विदेश के मनखे मन बर आकर्षण के केंद्र बने हे। छत्तीसगढ़ पवेलियन म ‘गढ़बो नवा छत्तीसगढ़’ के झलक देखे ल मिलत हे। ये पईत अंतर्राष्ट्रीय व्यापार मेला म छत्तीसगढ़ पवेलियन म घलोक सुदृढ़ ग्रामीण अर्थव्यवस्था अऊ आत्मनिर्भरता कोति बढ़त छत्तीसगढ़ ल देखाय के उदीम करे गए हे। इहां प्रदर्शनी बोर्ड के माध्यम ले आगंतुक मन ल छत्तीसगढ़ के ग्रामीण अर्थव्यवस्था ल नवा दिशा देवइया योजना मन के जानकारी देहे जात हे।
आज मेला म छत्तीसगढ़ राज्य औद्योगिक विकास निगम (सीएसआईडीसी) के मुख्य महाप्रबन्धक श्री एसके सिन्हा ह ज्यूरी के सदस्य मन ल छत्तीसगढ़ के पवेलियन के अवलोकन कराइस। उमन ज्यूरी के सदस्य मन ल नरवा, गरवा, घुरवा अऊ बाड़ी के संगेच ग्रामीण औद्योगिक पार्क के संबंध म विशेष जानकारी दीन।
पवेलियन म मॉडल के माध्यम ले छत्तीसगढ़ सरकार के नवा पहल ग्रामीण औद्योगिक पार्क ल प्रस्तुत करे गए हे, जेन ग्रामीण क्षेत्र म रोजगार के नवा अवसर प्रदान करत हे। ये योजना के माध्यम ले चुने गए गौठान मन ल ग्रामीण औद्योगिक पार्क के रूप म विकसित करे गए हे। जिहां केंचुआ खाद उत्पादन के अलावा मुर्गी पालन, मत्स्य पालन, खाद्य प्रसंस्करण जइसे गतिविधियां चलत हे। ये योजना ले गौठान ले जुड़े महिला स्‍व सहायता समूह मन (एसएचजी) अऊ स्थानीय युवा मन ल रोजगार मिलत हे।
एखर संगेच पवेलियन म छत्तीसगढ़ सरकार के महत्वाकांक्षी सुराजी गाँव योजना, नरवा, गरवा, घुरवा अऊ बाड़ी, राजीव गांधी किसान न्याय योजना, गोधन न्याय योजना ल प्रस्तुत करे गए हे। ए योजना मन के माध्यम ले छत्तीसगढ़ के ग्रामीण अर्थव्यवस्था ल मजबूती मिले हे। उहें, छत्तीसगढ़ स्टेट पावर कंपनी के स्टॉल म ग्रामीण विद्युतीकरण योजना ल मॉडल ले प्रदर्शित करे हे। ये योजना के माध्यम ले छत्तीसगढ़ के अंदर के क्षेत्र मन म शत-प्रतिशत के लक्ष्य रखे गए हे।