रायपुर, जनसंपर्क विभाग कोति ले टाऊन हॉल म लगाए गए प्रदर्शनी गढ़बो नवा छत्तीसगढ़ के तीसर दिन आज दर्शक मन के रेला लगे रहिस। मुख्यमंत्री के मीडिया सलाहकार श्री रुचिर गर्ग ह आज प्रदर्शनी के अवलोकन करिन अऊ विजिटर बुक म गढ़बो नवा छत्तीसगढ़ लिखके अपन विचार व्यक्त करिन।
प्रदर्शनी देखे अवइया विवेकानंद हाई स्कूल, पंडरी अऊ शासकीय हिंदु उच्चतर माध्यमिक विद्यालय अऊ प्रोफेसर जे.एन. पांडेय शासकीय बहु उद्देशीय उच्चतर माध्यमिक विद्यालय रायपुर के 70 छात्र-छात्रा मन ह कहिन कि प्रदर्शनी अब्बड़ ज्ञानवर्धक, रोचक अऊ उत्साहित करइया हे। पढ़ईया लईका मन ह कहिन कि ये प्रदर्शनी म राज्य के विकास अऊ स्वतंत्रता सेनानी मन के विसय म सागरभित जानकारी दिए गए हे। छत्तीसगढ़ सरकार के अवइया विकास के रूपरेखा घलोक प्रदर्शित हे। ये प्रदर्शनी म लइका मन ल शिक्षा, स्वास्थ्य, सुपोषण अभियान, जनचौपाल, महिला सशक्तीकरण, नरवा, गरवा, घुरवा अऊ बारी के बारे म शिक्षाप्रद जानकारी मिलीस। छात्र-छात्रा मन ह ये घलोक बताइन कि प्रदर्शनी म ओ मन ल छत्तीसगढ़ के सांस्कृतिक विरासत, तीज-तिहार, गांव मन के विकास अऊ खेती-किसानी के बारे म जानकारी मिलीस। लइका मन ह प्रदर्शनी म बांटे जात छत्तीसगढ़ सरकार के विशेष पहल अउ उपलब्धियां सीरसक वाले पुस्तिका ल बहुत ही उपयोगी बताइन।
प्रदर्शनी देखे आए ग्राम सड्डू के श्री रामकुमार बंजारे ह कहिन कि प्रदर्शनी लइका मन के कौशल विकास अऊ सबो दृष्टि ले रोचक अऊ ज्ञानवर्धक हे। ग्राम बोड़रा आरंग के श्री तरुण गितलहरे ह कहिन कि ये प्रदर्शनी बहुत अच्छा हे ये मां हमला अपन सांस्कृतिक परंपरा मन के झलकी मन ल देखे के अवसर मिलिस। रायपुर के श्री के. फेकर ह कहिन कि प्रदर्शनी हमला छत्तीसगढ़ी के परम्परा अऊ तीज-तिहार के सुरता देवाथे। छत्तीसगढ़ मंत्रालय संघ के अध्यक्ष श्री किर्तिवर्धन उपाध्याय ह कहिन कि बहुतेच सराहनीय प्रदर्शनी हे एला हर एक जिला अऊ तहसील मन म घलोक लगाना चाही।
