नई दिल्ली म आयोजित लीडरशिप समिट म छत्तीसगढ़ के मुख्यमंत्री भूपेश बघेल होइन सामिल
रायपुर, नई दिल्ली म आयोजित लीडरशिप समिट म छत्तीसगढ़ के मुख्यमंत्री श्री भूपेश बघेल ह संघरिन। ये बेरा म उमन कहिन कि हमर सरकार 11 महिना जुन्ना हे। फेर अतीक कम समय म राज्य के फिजा एतका बदल गए हे कि दुनिया अऊ देश म ये समय जऊन चुनौती हे ओमां छत्तीसगढ़ अटल, अडिग अऊ निरन्तर विकसित अर्थव्यवस्था के रूप म खड़े रह सके हे।
मुख्यमंत्री श्री बघेल ह बताइस कि 11 महीना म छत्तीसगढ़ के बेरोजगारी दर म जिहां 6 प्रतिशत गिरावट आए हे, उन्हें 11 महीना म ही प्रदेश म रियल सेक्टर म 70 प्रतिशत उछाल ओटोमोबाइल सेक्टर म 35 प्रतिशत तक बढ़ोतरी संग बाजार ले गए रौनक वापस लहुट आए हे। ये सब चमत्कार नइ हे। हमन गांधी के विचारधारा के मॉडल ल अपनाए हन। हम नरवा, गरवा, घुरवा, बारी के जऊन योजना उपर काम करत हन वो महज कोनो सरकारी योजना भर नो हे, भलुक जन विकास के एक वैकल्पिक मॉडल हे।
श्री बघेल ह समिट म कहिन कि देश ल भावनात्मक आधार म नइ चलाए जा सकय, एखर बर अर्थव्यवस्था म सुधार करनाच होही। समिट ल संबोधित करत श्री बघेल ह कहिन कि छत्तीसगढ़ म किसान मन के करजा माफ करे गए हे, किसान मन ले 2500 रूपिया कुंटल म धान बिसाए जात हे, इही सेती राज्य म मंदी के असर नइ होए हे। छत्तीसगढ़ म ऑटोमोबाइल्स, रियल इस्टेट संग सबो क्षेत्र मन म उछाल देखे ल मिलत हे। उमन कहिन आम जनता के जेब म पइसा डारे म ही बाजार म पइसा आही।
छत्तीसगढ़ के मुख्यमंत्री श्री भूपेश बघेल ह कहिन कि, दुनिया म अइसन उदाहरण कम होही कि ग्रामीण व्यवस्था के सुधार म खेती छोड़ डरे किसान हजारों के संख्या म वापस खेत मन म लहुट आए हें। पलायन वाले दौर अब छत्तीसगढ़ म नइ रहिस, पुनर्वास के ये नवा दौर हे, जऊन छत्तीसगढ़ सरकार के प्रति जनता के बढ़त विश्वास के तस्दीक करे हे। समिट म देश-विदेश ले आए ख्याति प्राप्त बुद्धिजीवी घलोक उपस्थित रहिन। जीएसटी म राज्य मन ल मिलइया क्षतिपूर्ति अनुदान ले सम्बंधित एक सवाल के जवाब म मुख्यमंत्री श्री बघेल ह बताइस कि, छत्तीसगढ़ म क्षतिपूर्ति के माँग साल 2018-19 म बढ़के 6500 करोड़ हो जाही। केंद्र कोति ले अब तक जीएसटी कंपनसेशन रिलीज नइ होए ले राज्य ल राजस्व के बड़ हानि होवत हे अऊ विकास के काम घलोक प्रभावित होवत हे।
श्री बघेल ह कहिन कि, हमर सरकार ह नेहरू – गांधी के विचारधारा ल आत्मसात करे हे। हमन अन्याय अऊ शोषण के खिलाफ हमेशा अवाज उठाए हन। अनुसूचित-जाति-जनजाति व पिछड़ा वर्ग मन के अधिकार मन के रक्षा बर हमेशा प्रतिबद्ध घलोक रहे हन। उमन कहिन कि हम, इही प्रतिबद्वता अऊ जन विकास के औजार के सहारे गढ़बो नवा छत्तीसगढ़ के लक्ष्य के संग आगू बढ़त हन। आज छत्तीसगढ़ के उदार विरासत, अपार संसाधन मन अऊ उत्साही नीति मन के सेती देश म छत्तीसगढ़ विकास अऊ विश्वास के चिनहा बन गए हे।
