राजस्व संबंधी काम मन बर अब नइ जाए ल परय जिला मुख्यालय: श्री कवासी लखमा

सुकमा, 18 नवंबर 2020। मुख्यमंत्री श्री भूपेश बघेल ह प्रदेश ल 23 नवा तहसील के सौगात देहे हें। इही कड़ी म सुकमा जिला के गादीरास ल घलोक तहसील कार्यालय के दर्जा दे गए हे। उद्योग अऊ आबकारी मंत्री श्री कवासी लखमा ह गादीरास तहसील कार्यालय के शुभारम्भ करिन। उमन तहसील कार्यालय भवन बर विधिवत जमीन के चिन्हारी करवा के भवन निर्माण करवाए के बात कहिन। उमन कहिन के एखर से गादीरास ले लगे कोंड्रे, गोंदपल्ली, गोंडेरास, मानकापाल, मारोकी आदि अड़बड़ दुर्गम क्षेत्र के गांव वाले मन ल बहुत जादा राहत मिलही। उमन कहिन के तहसील के दर्जा मिल जाय ले अब गादीरास क्षेत्र म विकास के काम मन ल गति देहे बर अधोसंरचना के निर्माण म घलोक तेजी आही। जेखर सकारात्मक प्रभाव निश्चित तौर म गांव वाले मन ल मिलही। क्षेत्र म यातायात के सुचारू व्यवस्था नइ होए के सेती गांव वाले मन ल तहसील ले संबंधित काम बर सुकमा जाए ल परत रहिस जेन अड़बड़ कष्टप्रद रहिस, फेर अब गादीरास म तहसील कार्यालय खुल जाए ले गांव वाले मन ल अड़बड़ लाभ मिलही।
मंत्री श्री लखमा ह तहसील कार्यालय के शुभारम्भ के बेरा म उपस्थित गांव वाले मन ले उंखर समस्या मन ल सुनिन अऊ वोकर लडहे निराकरण के आश्वासन दीन। उमन गांव वाले मन ले सड़क अऊ आन बुनियादी सुविधा आदि के संबंध म चर्चा करत कहिन के गादीरास म तहसील कार्यालय के स्थापना ले निश्चित तौर म जमीन ले संबंधित काम जइसे, नामांतरण, बंटवारा, सीमांकन आदि काम मन के संगेच आय, जाति अऊ निवास प्रमाण पत्र जइसे बहुत अकन काम बर गांव वाले मन ल सुकमा जाय के जरूरत नइ परय। अब गादीरास म तहसील कार्यालय के शुभारम्भ ले गादीरास निवासी मन ल सुविधा होही। ये बेरा म जिला पंचायत अध्यक्ष श्री हरीश कवासी संग आन जनप्रतिनिधिगण अऊ अधिकारी कर्मचारी उपस्थित रहिन।