फार्म हाउस म खेलत रिहिस जुआ,पुलिस ह घेराबंदी करके 7 लोगन ल दबोचिस

रायपुर, 6 अक्टूबर 2020। राजधानी के मंदिर हसौद थाना क्षेत्र के ग्राम सिवनी स्थित फार्म हाउस म जुआ खेलत पुलिस ह 7 जुआरी मन ल सोमवार संझा गिरफ्तार करे हे। आरोपी मन के कब्जा ले 26 लाख 9 हजार 300 सौ रुपिया ,ताश पत्ती अउ 7 मोबाइल फोन जब्त करिन। मुखबिर के सूचना म साइबर सेल अउ थाना मंदिर हसौद के संयुक्त टीम ह कार्रवाई करे हे। सबो आरोपी मन के खिलाफ थाना मंदिर हसौद म धारा 13 जुआ एक्ट के तहत मामला दर्ज करे गे हे। साथ ही अलग से धारा 151 के तहत घलो कार्रवाई करे गिस। पुलिस फार्म हाउस के मालिक के भूमिका के संबंध म घलो जांच करत हे। पुलिस के अनुसार मुखबिर ले सूचना मिले रिहिस कि ग्राम सिवनी के फार्म हाउस म कुछ व्यक्ति जुआ खेलत हे। सूचना म वरिष्ठ अधिकारी मन के निर्देशन म साइबर सेल अउ थाना मंदिर हसौद के एक विशेष टीम रवाना करे गिस। टीम ह घेराबंदी करके 7 आरोपी मन ल जुआ खेलत रंगे हाथ गिरफ्तार करिन। गिरफ्तार आरोपी मन म सुनील जग्गी (45) निवासी रामनगर गुढ़ियारी, प्रकाश पाल (39) निवासी गंगा नगर खमतराई, गणेश शुक्ला (62)निवासी देवेंद्र नगर सेक्टर 4,राकेश श्रीवास्तव (48)निवासी खुर्सीपार भिलाई ,दिलीप कुमार माहेश्वरी (40)निवासी नयापारा नवीन स्कूल के पास बेमेतरा,देवेंद्र कुमार साहू (30)निवासी महावीर वार्ड भाटापारा अउ देव कुमार (56)निवासी शीतला माता मंदिर के पीछू पुरानी बस्ती सामिल हे।