पुलिस थाना म ऑपरेटर के नौकरी लगाय के चलत रिहिस खेल, फर्जी ज्वाइनिंग लेटर घलो थमाइस

कवर्धा, 7 सितंबर 2020। जिला म पुलिस थाना म फर्जी कम्प्यूटर ऑपरेटर के नौकरी लगाय के बड़का खेल चलत रिहिस जेकर भांडा फूटे के बाद 4 आरोपी ल पुलिस ह धर दबोचिस। मिले जानकारी के अनुसार शहर म बेरोजगार युवक मन ल एक एजेंसी के माध्यम ले पुलिस विभाग म नौकरी लगाय बर युवा मन ले 20 हजार ले जादा रुपिया लेवत रिहिस। एकर बाद एक हॉल म उमन ल ट्रेनिंग देवत रिहिस। एक दिन के प्रशिक्षण बर करीब 16 युवक मन ल दुर्ग ट्रेनिंग के नाम बर ले गे रिहिस। फर्जी कंपनी ह ट्रेनिंग पूरा होगे करके ओमन ल अलग-अलग थाना म ज्वाइनिंग लेटर घलो थमा दे रिहिन। एकर बाद युवक थाना पहुचीस त पता चलीस उंखर ज्वाइनिंग लेटर ही फर्जी हे। एकर बाद पूरा ममला के खुलासा होइस। आरोपी के पास ले कम्प्यूटर, टेबल, प्रिंटर्स, फोन व फर्नीचर्स जब्त करिन। संग म 4 आरोपी मन ल घलो गिरफ्तार करे गिन।