मुख्यमंत्री श्री बघेल गम्मत कलाकार मन के प्रदर्शन ल देखके उंखर से मिले मंच तक पहुंच गे
रायपुर, छत्तीसगढ़ टूरिज्म बोर्ड अऊ संस्कृति विभाग कोति ले चंदखुरी म आयोजित तीन दिवसीय आयोजन के दूसर दिन सांस्कृतिक संध्या कार्यक्रम अड़बड़ मनोरंजक रहिस। कार्यक्रम म कौशल्या माता अऊ प्रभु राम ले जुड़े बहुत अकन प्रसंग मन ल मानस मंडली के कलाकार मन बड मनमोहक ढंग ले प्रस्तुति दीन।
कार्यक्रम म श्री राम मानस मंडली रिसामा भिलाई के श्री लेखूराम साहू मंडली कोति ले आयोजित रामलीला म गम्मत के शानदार प्रस्तुति देहे गीस जेन उहां बइठे श्रद्धालु अऊ दर्शक मन ल हंसी ले लोटपोट कर दीस। कार्यक्रम म गम्मत कलाकार जोक्कर ह सूत्रधार के मतलब बताए बर जे प्रकार ले हँसिया के धार, बंसुला के धार, टंगीया के धार, तेल के धार जइसे हास्य भरे उदाहरण प्रस्तुत करिस ते ल सुनके सबो श्रद्धालु अऊ दर्शकगण हांस-हांस के लोटपोट हो गे। अइसनहे आचार्य के मतलब बताय बर आमा के अचार, निमउ के अचार, मिरचा के अचार जइसे हास्य प्रसंग अदायगी ले गम्मत कलाकार मन के प्रहसन ले भरपूर दृश्य ल देखके उहां उपस्थित मुख्यमंत्री श्री भूपेश बघेल, पर्यटन मंत्री श्री ताम्रध्वज साहू, संस्कृति मंत्री श्री अमरजीत भगत संग आन जनप्रतिनिधि घलोक अपन हंसी रोक नइ पाइन अऊ पूरा मंच हंसी के ठहाका ले गूंज उठिस। मुख्यमंत्री श्री बघेल गम्मत कलाकार मन के प्रदर्शन ल देखके उंखर से मिले मंच तक पहुंच गे।