- स्वामी आत्मानंद जयंती समारोह के अवसर म मुख्यमंत्री श्री भूपेश बघेल ह कहिन
- पाटन नगर पंचायत म 5.75 करोड़ रूपिया के विकास काम मन के करिन भूमिपूजन
रायपुर, दुर्ग जिला के पाटन म आयोजित स्वामी आत्मानंद जयंती समारोह म मुख्यमंत्री श्री भूपेश बघेल ह स्वामी आत्मानंद जी के यशस्वी पल मन ल साझा करिन। उमन कहिन कि वर्धा आश्रम म स्वामी जी के पिता बुनियादी शिक्षक रहिन, गांधी जी के प्रेम स्वामी जी ल खूब मिलीस।
जब ओ मन 4 साल के रहिन तो गांधी जी के भजन रघुपति राघव राजाराम म हारमोनियम म संगत देवत रहिन। बाद म स्वामी विवेकानंद के विचार मन के घलोक उन उपर गहरा असर होइस अऊ उमन अपन पूरा जीवन दरिद्र नारायण के सेवा म बिता दीन। मुख्यमंत्री ह कहिन कि ईशोपनिषद उपर स्वामी जी के व्याख्या अद्भुत हे। ऊंखर गीता तत्व चिंतक के रिकॉर्डिंग उपलब्ध हे। एला सुनना ज्ञान के सागर म बूडे़ जइसे हे। जब ओ मन राम नाम संकीर्तन करत रहिन त उंखर सुमधुर अवाज म एला सुनना दैवीय अनुभव होत रहिस हे। मुख्यमंत्री ह कहिन कि आगू पइत जब हम सकलाबोन त एला सुनबोन अऊ आप मन घलोक एला महसूस करिहव।
मुख्यमंत्री ह ये बेरा म नारायणपुर आश्रम के स्थापना के संबंध म घलोक विस्तार ले बताइन। उमन बताइन कि ओ समय स्वामी आत्मानंद लउहे-लउहे सेवा के अद्भुत काम करत रहिन। जब बेलूर मठ म स्वामी वीरेश्वरानंद जी के आखरी यात्रा म देश के प्रधानमंत्री इंदिरा गांधी स्वामी जी ले मिलीन त कहिन कि नारायणपुर म आप मन के आश्रम के गतिविधि संचालित होही त ये वन्य क्षेत्र म सेवा के काम मन के विस्तार होही। एखर बाद आश्रम के रूपरेखा तियार हो गीस अऊ सेवा के काम उहां सुरू होइस।
7 लइका रहिन, सब्बो मेरिट म आइन-
मुख्यमंत्री ह ये बेरा म एक रोचक वाकया बताइन। उमन कहिन कि जब पहली पइत आश्रमठ के लइका पांचवी पहुंचिन तब पहिली ले लेके 7वां स्थान तक इहें के लइका मेरिट म आइन। कोनो ह पूछिन के आठवां स्थान ले कइसे चूक गे तब बताइन के पहली बैच म सिरिफ 7 लइका ही रहिन।
लइका मन ल सौंपिन जाति प्रमाण पत्र-
ये बेरा म मुख्यमंत्री ह 3 लइका मन ल जाति प्रमाण पत्र सौंपिन। रायपुर मेडिकल कॉलेज म चुने गे मानसी वर्मा के सम्मान घलोक उमन करिन।
5 करोड़ 75 लाख के विकास काम मन के करिन भूमिपूजन
माई काम मन म 1 करोड़ 24 लाख रूपिया के लागत ले वार्ड नंबर 3 म सामुदायिक भवन निर्माण काम, 41 लाख रूपिया के लागत ले वार्ड नंबर 2 म पुष्पवाटिका सौंदर्यीकरण काम, वार्ड नंबर 14 म घलोक 46 लाख रूपिया के लागत ले पुष्पवाटिका सौंदर्यीकरण काम, वार्ड नंबर 14 म 24 लाख रूपिया के लागत ले मरही तालाब म पाथवे अऊ पिचिंग काम, वार्ड नंबर 15 म 34 लाख रूपिया के लागत ले सामुदायिक भवन जीर्णोद्धार काम, वार्ड नंबर 13 म 53 लाख रूपिया के लागत ले स्टेडियम जीर्णोद्धार काम, वार्ड नंबर 2 म 23 लाख रूपिया के लागत ले मुक्तिधाम सौंदर्यीकरण काम, वार्ड नंबर 2 म 20 लाख रूपिया के लागत ले सतनाम भवन म हॉल निर्माण अऊ सौंदर्यीकरण काम, वार्ड नंबर 3 म 5 लाख रूपिया के लागत ले भोई कहार समाज सामुदायिक भवन निर्माण, वार्ड नंबर 6 म 5 लाख रूपिया के लागत ले विप्र समाज भवन अहाता निर्माण काम, वार्ड नंबर 15 म 24 लाख रूपिया के लागत ले गौठान निर्माण काम सामिल हे। एखर अकतहा 22 लाख रूपिया ले कई ठन वार्डों म विद्युतीकरण काम अऊ 39 लाख रूपिया के लागत ले डामरीकरण अऊ सीसी रोड निर्माण काम सामिल हे। एखर संग ही 20 लाख रूपिया के लागत ले देवांगन समाज भवन म शेड निर्माण काम अऊ शहीद वीरनारायण भवन म 15 लाख रूपिया के लागत ले चेक टाइल्स अऊ ऊपर भवन बनाए भूमिपूजन करे गीस।
