- मुख्यमंत्री श्री भूपेश बघेल के नेतृत्व म पूरा राज्य म होही विशेष आयोजन
- विधानसभा के विशेष सत्र, पदयात्रा अऊ चार बड़े योजना मन के होही शुभारंभ
रायपुर, राष्ट्रपिता महात्मा गांधी के 150वां जयंती ल खास अऊ यादगार बनाए मुख्यमंत्री श्री भूपेश बघेल के नेतृत्व म पूरा छत्तीसगढ़ राज्य म विशेष आयोजन हावइया हे। ये आयोजन दू अकटूबर, 2019 ले शुरु होके दू अकटूबर, 2020 तक चलही। महात्मा गांधी जी के जन्म दिन दू अकटूबर ले छत्तीसगढ़ विधानसभा के दू दिवसीय विशेष सत्र आहूत करके गांधी जी के व्यक्तित्व, कृतित्व अऊ देश के आजादी म ऊंखर योगदान ल सुरता करे जाही। गांधी जी के छत्तीसगढ़ यात्रा संग देश के आजादी बर करे गए आन्दोलन अऊ जनजागरण के काम मन के स्मृति मन उपर आधारित प्रदर्शिनी छत्तीसगढ़ विधानसभा परिसर म लगाए जाही।
मुख्यमंत्री श्री भूपेश बघेल के नेतृत्व म राज्य सरकार कोति ले दू अकटूबर ले प्रदेश म चार बड़े महत्वपूर्ण योजना मन ल घलोक चालू करे जातहे जऊन प्रदेशवासी मन के बेहतर पोषण अऊ स्वास्थ्य बर महत्वपूर्ण साबित होही। अवइया दू अकटूबर ले प्रदेश म मुख्यमंत्री हाट बाजार क्लिनिक योजना, मुख्यमंत्री सुपोषण अभियान, मुख्यमंत्री शहरी स्लम स्वास्थ्य योजना अऊ सार्वभौम सार्वजनिक वितरण प्रणाली के शुभारंभ करे जाही।
गांधी जयंती के दिन भिनसरहा बच्चा-बच्चा गांधी थीम म एक हजार लइका बापू के वेशभूषा म शहर के जयस्तंभ चौक ले गांधी मैदान तक पदयात्रा निकालहीं। एखर बाद चार अकटूबर ले 10 अकटूबर तक धमतरी जिला के कण्डेल ले रायपुर तक पदयात्रा आयोजित करे जाही। एला ‘गांधी विचार यात्रा’ के नाम दे गए हे। ए पदयात्रा म मुख्यमंत्री श्री भूपेश बघेल संग बड़ संख्या म प्रदेश के जनप्रतिनिधि अऊ नागरिकगण सामिल होहीं। कंडेल म किसान मन के नहर सत्याग्रह चले रहिस जेमां हिस्सा लेहे बर गांधी जी रायपुर तक पहुंचे रहिन, तब किसान मन के मांग मान लेहे गए रहिस। ये पदयात्रा 11 ले 17 अकटूबर तक प्रदेश के हर ब्लॉक म ‘गांधी विचार यात्रा’ के नाम ले चलाए जाही।
गांधी जी के 150वां जयंती के अवसर म साल भर प्रदेश के सबो स्कूल-कॉलेज मन म घलोक बड़े पैमाना म कई प्रकार के आयोजन करके छात्र मन ल गांधी जी के आदर्शो अऊ विचार ले अवगत कराए जाही। ये मां निबंध, चित्रकला अऊ भाषण प्रतियोगिता सामिल हे।
