चोरभट्टी, बगदेही अऊ भेण्डरवानी के सभा म गांधी जी के सत्य, स्वावलंबन अऊ करूणा के संदेश
रायपुर, गांधी विचार पदयात्रा तीसर दिन भुसरेंगा ले चालू होइस। ये पदयात्रा ग्राम चोरभट्टी, बगदेही, भेण्डरवानी, देवरी, कोसमर्रा, सिहाद होत भखारा पहुंचिस। पदयात्रा म स्कूल शिक्षा मंत्री श्री प्रेमसाय सिंह टेकाम अऊ विधायक मन संग बड़ संख्या म जनप्रतिनिधि अऊ गणमान्य नागरिक घलोक सामिल होइन। पदयात्रा के बेरा म चोरभट्टी अऊ भेण्डरवानी म आयोजित सभा म जनमानस ल गांधी जी के सत्य, स्वालंबन अऊ करूणा के संदेश दे गीस। सभा मन म स्कूल शिक्षा मंत्री श्री टेकाम ह संबोधित करत कहिन कि गांधी जी के सत्य, अहिंसा, करूणा अऊ भाईचारा के रद्दा म चलत ऊंखर सपना ल पूरा करे बर सबो के स्वावलंबी होना जरूरी हे। गांधी जी के आदर्श अऊ विचार हमेशा प्रासंगिक रइही। उमन सत्य अऊ अहिंसा के मार्ग म चलके देश ल आजादी देवाइन। छत्तीसगढ़ सरकार गांधी जी के विचार के मुताबिक प्रदेश म भाईचारा अऊ सामाजिक समरसता कायम रखके गांव मन के चहुंमुखी विकास बर काम करत हे। उमन राज्य सरकार कोति ले संचालित कई ठन जनकल्याणकारी योजना मन के जानकारी दीन अऊ नवा छत्तीसगढ़ अऊ समृद्ध छत्तीसगढ़ बनाए म जन सहयोग के अपील करिन।
चोरभट्टी, बगदेही अऊ भेण्डरवानी के सभा मन ल राज्यसभा सांसद श्रीमती छाया वर्मा, विधायक श्री मोहन मरकाम, श्री विनोद चन्द्राकर, श्रीमती लक्ष्मी धु्रव, श्री इन्द्रसाय मंडावी, श्रीमती ममता चन्द्राकर, श्री शिशुपाल सोरी ह घलोक संबोधित करके गांधी जी के आदर्श अऊ ऊंखर प्रेरक प्रसंग मन के बारे म मनखे मन ल बताइन। गांधी विचार पदयात्रा म छत्तीसगढ़ राज्य हथकरघा विकास अऊ विपणन संघ के अध्यक्ष श्री मोतीलाल देवांगन संग सर्वश्री चंदन यादव, मोहन लालवानी, निशु चन्द्राकर, शिवदयाल बंजारे, धर्मेद यादव, पूर्णचंद पाढ़ी, विनोद वर्मा, आकाश शर्मा, पंकज शर्मा संग बड़ संख्या म ग्रामवासी सामिल रहिन।
