मुख्यमंत्री ह ’गांधी विचार पदयात्रा’ के समय डूंडा म आमसभा ल करिन सम्बोधित
रायपुर, मुख्यमंत्री श्री भूपेश बघेल ह कहिन हे कि राष्ट्रपिता महात्मा गांधी के राष्ट्रवाद म समाज के हर वर्ग बर जगा हे। ऊंखर राष्ट्रवाद म कमजोर ले कमजोर मनखे के असहमति के घलोक सम्मान हे। महात्मा गांधी के राष्ट्रवाद हमार संत, महात्मा, महान विचारक, महावीर स्वामी, गौतम बुद्ध, गुरूनानक, कबीर, बाबा गुरू घासीदास जइसे विभूति मन के विचार मन ले प्रभावित हे। मुख्यमंत्री आज राष्ट्रपिता महात्मा गांधी के 150वां जयंती के अवसर म आयोजित ‘गांधी विचार पदयात्रा’ के सातवां दिन रायपुर जिला के डूंडा म एक विशाल आमसभा ल सम्बोधित करत रहिन।
मुख्यमंत्री ह आमसभा ल सम्बोधित करत कहिन कि देश के स्वतंत्रता आंदोलन के बेरा म छत्तीसगढ़ के ग्राम कंडेल म पहिली सविनय अवज्ञा आंदोलन होए रहिस। इहां किसान मन उपर अंग्रेज मन कोति ले सिंचाई कर लगाय के निर्णय के विरोध म स्वतंत्रता संग्राम सेनानी स्वर्गीय श्री बाबू छोटेलाल श्रीवास्तव के नेतृत्व म कंडेल नहर सत्याग्रह करे गीस। किसान मन ह अंग्रेज मन कोति ले लगाए गए सिंचाई कर ल देहे ले इंकार कर दे रहिन। ए नहर सत्याग्रह म सामिल होए बर महात्मा गांधी कंडेल आए रहिन। ये सूचना मिले म अंग्रेज मन ल सिंचाई कर हटाना परिस। कंडेल नहर सत्याग्रह के सुरता ल बनाए रखे बर अऊ गांधी के विचार मन ल जन-जन तक पहुंचाए बर कंडेल ले ‘गांधी विचार पदयात्रा’ चालू करे गए हे।
मुख्यमंत्री के नेतृत्व म डूंडा ले पदयात्रा म कृषि मंत्री श्री रवीन्द्र चौबे, गृह मंत्री श्री ताम्रध्वज साहू, स्वास्थ्य मंत्री श्री टी.एस. सिंहदेव, स्कूल शिक्षा मंत्री डॉ. प्रेमसाय सिंह टेकाम, विधायक श्री मोहन मरकाम, श्री कुलदीप जुनेजा, श्री विकास उपाध्याय, श्रीमती अनिता शर्मा, सुश्री शकुंतला साहू, राज्यसभा सांसद श्रीमती छइंहा वर्मा, नगर निगम रायपुर महापौर श्री प्रमोद दुबे संग बहुत अकन जनप्रतिनिधि अऊ नागरिक बड़ संख्या म सामिल होइन। ये बेरा म जगा-जगा मनखे मन ह मुख्यमंत्री अऊ पदयात्री मन के अभूतपूर्व स्वागत करिन।
