रायपुर, महात्मा गांधी के 150 वीं जयंती समारोह के अवसर म गत 4 अकटूबर के दिन धमतरी जिला के ग्राम कण्डेल ले चालू “गांधी विचार पदयात्रा“ आज भिनसरहा रायपुर जिला के ग्राम खोरपा ले चालू होके कोलर गांव अऊ फिर उहां ले रवाना होके छैछानपैरी पहुंचिस। ग्राम खोरपा, कोलर अऊ छैछानपैरी म सभा के आयोजन घलोक करे गीस। पदयात्रा म नगरीय प्रशासन मंत्री डॉ. शिव डहरिया, विधायकगण सर्व श्री मोहन मरकाम, धनेन्द्र साहू, अमितेष शुक्ला, देवेन्द्र यादव, श्रीमती लक्ष्मी ध्रुव संग जनप्रतिनिधि मन अऊ गांव वाले मन अड़बड़ झन सामिल होइन।
हम आप ल बता देवन के आज मंझनिया के बाद ये पदयात्रा छैछानपैरी ले होत मुजगहन अऊ फेर सेजबहार पहुंचिस। ये पदयात्रा काल 10 अकटूबर के दिन सेजबहार गांव ले चालू होही। एखर बाद ये यात्रा 10:30 बजे डूंडा, 12:30 बजे संतोषी नगर अऊ 2 बजे रायपुर के गांधी मैदान म पहुंचही। डूंडा अऊ संतोषी नगर म घलोक सभा मन के आयोजन करे गए हे। गांधी मैदान म गांधी विचार यात्रा के समापन समारोह आयोजित करे गए हे।