गांधी विचार पदयात्रा म उमडि़स जनसैलाब : गांव वाले मन ह फूल बरसाके मुख्यमंत्री अऊ पदयात्री मन के करिन अभूतपूर्व स्वागत
राष्ट्रपिता महात्मा गांधी अऊ बाबू छोटेलाल श्रीवास्तव के प्रतिमा के अनावरण
रायपुर, मुख्यमंत्री श्री भूपेश बघेल ह राष्ट्रपिता महात्मा गांधी के 150वीं जयंती के अवसर म गांधी ग्राम-कंडेल ले ’गांधी विचार पदयात्रा’ के शुभारंभ करिन। धमतरी के कंडेल ले आज चालू होवइया ये पदयात्रा 10 अकटूबर के दिन रायपुर के गांधी मैदान म पूरा होही। मुख्यमंत्री के नेतृत्व म ए पदयात्रा म प्रदेश मंत्रिमंडल के सदस्य, सांसद, विधायकगण मन के संग हजारो के संख्या म मनखे सामिल होइन। गांव वाले मन ह जगा-जगा म फूल बरसाके मुख्यमंत्री अऊ पदयात्री मन के अभूतपूर्व स्वागत करिन।
मुख्यमंत्री श्री भूपेश बघेल ह राष्ट्रपिता महात्मा गांधी अऊ कंडेल नहर सत्याग्रह के नायक बाबू छोटेलाल श्रीवास्तव के मूर्ति के अनावरण करत गांधी विचार पदयात्रा के शुभारंभ करिन। सप्ताहव्यापी ये पदयात्रा 10 अकटूबर के दिन रायपुर के गांधी मैदान म पूरा होही। एखर बाद 11 अकटूबर ले 17 अकटूबर तक प्रदेश के हर एक विकासखंड म गांधी विचार यात्रा के आयोजन करे जाही।
यात्रा के शुभारंभ के अवसर म कृषि मंत्री श्री रवीन्द्र चौबे, गृह मंत्री श्री ताम्रध्वज साहू, वन मंत्री श्री मोहम्मद अकबर, स्कूल शिक्षा मंत्री डॉ. प्रेमसाय सिंह टेकाम, उद्योग मंत्री श्री कवासी लखमा, राजस्व मंत्री श्री जय सिंह अग्रवाल, महिला अउर बाल विकास मंत्री श्रीमती अनिला भेंड़िया, खेल अउर युवा कल्याण मंत्री श्री उमेश पटेल, विधायक श्री मोहन मरकाम, राज्यसभा सांसद श्रीमती छइंहा वर्मा संग बहुत अकन जनप्रतिनिधि अऊ ग्रामीण बड़का संख्या म उपस्थित रहिन। मुख्यमंत्री ह एखर पहिली कंडेल म जनसहयोग ले बने गौठान के लोकार्पण करिन अऊ एखर बाद गौठान ले नहर सत्याग्रह उद्यान तक पैदल पहुचिन। मुख्यमंत्री ह ए अवसर म कहिन कि महात्मा गांधी के सत्याग्रह म पदयात्रा मन के बड़का भूमिका रहिस। बापू अपन पदयात्रा मन के माध्यम ले मनखे मन के बीच जागरूकता के संग सौहार्द्र के संचार करत रहिन। राज्य सरकार बापू के रद्दा म चले बर संकल्पित हे।