- गांधी विचार पदयात्रा के तीसर दिन भखारा म आमसभा ल मुख्यमंत्री ह करिन संबोधित
- 28 करोड़ ले जादा के लागत के 17 विकास काम मन के मुख्यमंत्री ह करिस लोकार्पण
रायपुर, प्रदेश के मुख्यमंत्री श्री भूपेश बघेल ह कहिन हे कि राज्य सरकार राष्ट्रपिता महात्मा गांधी के बताए मार्ग म चले बर प्रतिबद्ध हे। राज्य सरकार महात्मा गांधी के ग्राम स्वराज के संदेश ल आत्मसात करत किसान, मजदूर, महिला मन अऊ गांव के विकास बर सरलग काम करत हे। गांधीजी ह अहिंसा के रस्ता म चलके देश ल ब्रिटिश हुकूमत ले आजादी देवाइस ये अपन आप मन म एक मिसाल हे। महात्मा गांधी ह सामाजिक चेतना लाय के संगेच समाज के कई ठन वर्ग ल जोड़े के काम घलोक करिस। ऊंखर सत्य, अहिंसा अऊ करुणा के संदेश ल आगू बढ़ाए बर ये गांधी विचार यात्रा ऐतिहासिक नहर सत्याग्रह के तपोभूमि कंडेल ले पाछू 4 अकटूबर ले शुरू करे गए हे। ये पदयात्रा 10 अकटूबर के दिन राजधानी रायपुर के गांधी मैदान म खतम होही। एखर संग सबो विकासखण्ड मन म 11 ले 17 अकटूबर तक गांधी विचार पदयात्रा आयोजित करे जाही।
ये मौका म मुख्यमंत्री ह कहिन कि प्रदेश के किसान मन के कर्जा माफ करे के नतीजा हे कि उंकर खीसा म पइसा हे अऊ प्रदेश म ऑटो मोबाइल सेक्टर म मंदी नही भलुक वृद्धि होए हे। रामलीला मैदान भखारा म आयोजित आम सभा म विशाल जनसमूह ल संबोधित करे के संगेच मुख्यमत्री श्री बघेल ह स्वतंत्रता संग्राम सेनानी मन के परिजन मन ल घलोक सम्मानित करिन। संगेच 28.22 करोड़ रूपिया के लागत के 17 विकास काम मन के लोकार्पण करिन। कार्यक्रम म कोंडागाँव विधायक श्री मोहन मरकाम ह कहिन कि देश के विकास तभी संभव हे जब गांव अऊ गांव वाले मन के विकास होही, महिला मन सशक्त होही, युवा मन ल रोजगार मिलही, ये गांधी जी के विचार रहिस, ये दिशा म प्रदेश सरकार सतत प्रयासरत हे। कार्यक्रम ल अभनपुर विधायक श्री धनेंद्र साहू, कुरूद विधायक श्री अजय चंद्राकर ह घलोक संबोधित करिन।
आमसभा म प्रतिवेदन पाठन कलेक्टर धमतरी श्री रजत बंसल ह करिस अऊ जिला म संचालित गतिविधि मन के जानकारी दीन। ये दौरान प्रधानमंत्री आवास योजना के हितग्राही श्रीमती प्रमिला ध्रुव ल मकान के चाबी के संगेच काम पूर्णता के प्रमाण पत्र मुख्यमंत्री कोति ले सौंपे गीस। ये बेरा म दू वीडियो प्रदर्शित करे गीस। एमां पहिली वीडियो ’जब धमतरी घलोक सत्याग्रह के मिसाल बनिस’ अऊ दूसर वीडियो मुख्यमंत्री के सोच अऊ ग्राम स्वराज ल साकार करत ग्रामवासी’ सामिल हे। कार्यक्रम म राज्यसभा सांसद श्रीमती छाया वर्मा, कोंडागांव विधायक श्री मोहन मरकाम, महासमुंद विधायक श्री विनोद चन्द्राकर, सिहावा विधायक डॉ. लक्ष्मी ध्रुव मोहला- मानपुर विधायक श्री इन्द्रशाह मंडावी, पण्डरिया विधायक श्रीमती ममता चन्द्राकर, कांकेर विधायक श्री शिशुपाल सोरी संग बहुत अकन विधायकगण, गणमान्य नागरिक, जनप्रतिनिधि, आमजन उपस्थित रहिन।
