गांधीराम अजगल्ले के जिनगी म आइस नया बदलाव, मछली पालन ले कमावत हे सालाना आठ लाख रूपिया

CHHATTISGARHI NEWS: सारंगढ़-बिलाईगढ़, छत्तीसगढ़ शासन के ‘सेवा संकलप अभियान’ के तहत जिला के ग्राम बरदूला के रहवइया श्री गांधीराम अजगल्ले ह अपन कड़ा मेहनत अऊ सरकारी योजना के सही उपयोग ले अपन किसमत ला बदल डारे हे। कभू आर्थिक तंगी अऊ सीमित साधन के बीच जीवन बिताइया गांधीराम बर आज मछली पालन सिरिफ आजीविका के जरिया नो हे, बल्कि परिवार के किस्मत ला चमकाए के मजबूत साधन बनगे हे।
गांधीराम के जिनगी म ये सकारात्मक बदलाव ‘प्रधानमंत्री मत्स्य सम्पदा योजना’ के तहत आइस। ओ ह अपन खुद के जमीन म शून्य दशमलव बीस हेक्टेयर जलक्षेत्र म ‘तालाब लाइनर’ के निर्माण करिस। सोलह लाख अस्सी हजार रूपिया के लागत वाले ए प्रोजेक्ट बर ओला सरकार कोति ले चार लाख रूपिया के अनुदान मिलिस। योजना ले मिले ए सुरुवाती मदद ओला स्वावलंबन के नया रद्दा दिखा दीस।
तालाब तियार होए के बाद गांधीराम ह पूरा लगन अऊ नियम से मत्स्य पालन सुरू करिस। आज परिणाम ये हे के मात्र शून्य दशमलव बीस हेक्टेयर के ए छोटे से जलक्षेत्र ले ओ ह हर बछर औसतन सौ क्विंटल मछली के उत्पादन करत हे। बाजार म बिक्री के बाद सब खर्चा निकाल के ओला सालाना पांच ले आठ लाख रूपिया तक के शुद्ध मुनाफा मिलत हे।
योजना के लाभ मिले के पहिली गांधीराम के जिनगी बहुत संघर्षमय रहिस। परिवार के बुनियादी जरूरत ला पूरा करना घलो बड़े चुनौती रहिस। फेर आज ए व्यवसाय ले ओखर परिवार के आर्थिक स्थिति मजबूत होगे हे अऊ भविष्य सुरक्षित होगे हे। गांधीराम बताथे के योजना ले मिले सरकारी सहयोग ओला कमई के नवा रद्दा खोल के देहे हे, जेकर से परिवार के जरूरत आसानी से पूरा होत हे।