गणेश विसर्जन के झांकी के समय दर्दनाक हादसा – मुख्यमंत्री ह जताइन गहरा दुःख

जशपुर, जिला के बगीचा विकासखंड के जुरुडांड म गणेश विसर्जन के झांकी के समय होए दर्दनाक हादसा म तीन मनखे मन के मृत्यु अऊ कई आन मनखे मन के घायल होए के घटना म मुख्यमंत्री श्री विष्णु देव साय ह गहरा दुःख व्यक्त करे हे।
मुख्यमंत्री ह कहिन के ए हृदयविदारक घटना ले मैं व्यथित हंव। ईश्वर ले दिवंगत आत्मा मन के शांति अऊ घायल मन के लउहे स्वास्थ्य लाभ के कामना करत हंव। उमन शोक संतप्त परिजन मन के प्रति संवेदना प्रकट करत कहिन के ए दुःख के घड़ी म छत्तीसगढ़ सरकार मृतक मन के परिजन अऊ घायल मन के संग खड़े हे।
मुख्यमंत्री श्री साय ह घटना के जानकारी मिलतेच जिला प्रशासन ल घायल मन के समुचित चिकित्सा व्यवस्था अऊ जरूरी मदद ठउका करे के निर्देश दीन। उमन कहिन कि कोनो घायल ल इलाज म कोनो कमी झन होवय अऊ सबो ल तुरंत उचित उपचार उपलब्ध कराए जाय।
राज्य सरकार ह ए हादसा म दिवंगत तीनों मनखे के परिजन ल पाँच-पाँच लाख रुपिया के आर्थिक सहायता अऊ घायल मन ल पचास-पचास हजार रुपिया के सहायता राशि स्वीकृत करे हें। मुख्यमंत्री ह कहिन कि प्रशासन पीड़ित परिवार मन के संग सरलग संपर्क बनाए रखही अऊ ओ मन ल हर संभव सहयोग देही।