गणेशराम यादव के पक्का घर के सपना होइस साकार

मुंगेली, जिला के विकासखण्ड मुंगेली के ग्राम पण्डोतरा के ग्रामीण श्री गणेशराम यादव बहुत दिन ले अपन खुद के पक्का घर के सपना संजोए रहिस, फेर ओखर सपना साकार नइ होत रहिस। अइसन समय म मुख्यमंत्री श्री भूपेश बघेल ह गोधन न्याय योजना लागू करके दू रूपिया प्रति किलो के दर ले गोबर खरीदी के काम चालू करिस। मुख्यमंत्री के गोबर खरीदी के काम ले प्रभावित होके श्री यादव ह घलोक गौठान मन ले गोबर सकेल के बेचना शुरू करिस। वो ह 21 जुलाई 2020 ले अब तक करीबन 02 लाख 50 हजार रूपिया के गोबर बेचके अपन पक्का घर के सपना ल पूरा कर लेहे हे।
किसान श्री गणेशराम यादव ह बताइस कि ओखर घलोक सपना रहिस कि आन के जइसे ओखर घलोक एक पक्का मकान होवय। ओ अपन परिवार के संग पक्का मकान म रहके खुशहाल जीवन व्यतीत कर सकय। फेर उंखर आर्थिक स्थिति आड़े आ जात रहिस, जेखर सेती अब तक ओखर पक्का घर के सपना पूरा नइ हो पाए रहिस। एही बीच मुख्यमंत्री श्री बघेल ह 21 जुलाई 2020 ल छत्तीसगढ़ के पारंपरिक त्यौहार हरेली के दिन गोधन न्याय योजना के तहत गोबर खरीदी के शुरूआत करके वोखर तकदीर अऊ तस्वीर दुनों बदल दीन। एखर बर वो ह मुख्यमंत्री अऊ जिला प्रशासन के प्रति आभार व्यक्त करे हे।
श्री गणेशराम यादव ह बताइस कि योजना के शुरूआत ले अब तक वो ह करीबन 02 लाख 50 हजार रूपिया के गोबर बेंचे हे। अलग-अलग समय अऊ किस्त म मिले गोबर के राशि ल जमा करके वो ह एकर उपयोग मकान बनाए म करे हे। गोबर बेचे म हितग्राही श्री यादव के वोखर परिवार के मनखे मन ह घलोक भरपूर संग दीन। जेखर फलस्वरूप वो आज पक्का घर म खुशहाल जीवन व्यतीत करत हे। जानबा हे कि छत्तीसगढ़ शासन कोति ले किसान मन अऊ पशुपालक मन ल अकतहा लाभ प्रदान करे के उद्देश्य ले गोधन न्याय योजना के बेहतर क्रियान्वयन करे जात हे। एकर ताजा उदाहरण ग्राम पण्डोतरा के श्री गणेशराम यादव जइसे किसान हे, जेमन मुख्यमंत्री श्री भूपेश बघेल के मंशा ल पूरा करत ये देखा दीस कि छत्तीसगढ़ म गोबर ले कइसे राज्य के किसान धन कमावत हें अऊ आर्थिक रूप ले सुदृढ़ होवत हें। ये सिरिफ एक किसान गणेश के न ही, बल्कि जिला अऊ पूरा राज्य म संचालित गोधन न्याय योजना के सबले बड़का उदाहरण हे।