कवर्धा, चिल्फी पुलिस ह अवैध गांजा परिवहन म बड़का कारवाई करे हे। पुलिस ह दू आरोपी मन ल गिरफ्तार करके 60 लाख ले जादा के गांजा जब्त करे हे। येमन टैंकर के भीतरी म लोहा के चद्दर ले खंड बनाके गांजा तस्करी करत रहिन।
पुलिस के बताती, मुखबिर ले सूचना मिले रहिस कि रायपुर-जबलपुर मुख्य मार्ग म रायपुर कोति ले आत एक ट्रैक्टर टैंकर म बइठे मनखे मन के गतिविधि मन संदिग्ध लगात हे। सूचना ल गंभीरता ले लेत थाना प्रभारी चिल्फी ह तुरंते अपन स्टाफ के संग मुख्य मार्ग म बैरिकेड लगा के संदिग्ध ट्रैक्टर ल रोकवा के तलाशी लीस। ट्रैक्टर मम लगगे टैंकर के तलाशी जब लेहे गीस त, टैंकर के भीतर लोहा के चद्दर ल बेल्डिंग करके खंड बनाए गए रहिस जेमें 3 क्विंटल ले जादा गांजा मिलीस।
पुलिस ह गांजा जब्त करके आरोपी चालक दिनेश बढ़ई अऊ नंदराम बढ़ई ल गिरफ्तार कर लेहे हे। दुनों आरोपी उत्तरप्रदेश के निवासी यें, पुलिस ह जब्त गांजा के कुल कीमत 60 लाख 64 हजार बताए हे। घटना म प्रयुक्त ट्रैक्टर टैंकर वाहन ल घलोक जब्त करे गए हे। जेकर कीमत 4 लाख रुपिया हे। आरोपी मन उपर उचित कार्रवाई करके न्यायालय के आग पेश करे के बाद रिमांड म भेज देहे गए हे।
चिल्फी पुलिस ह 60 लाख के गांजा जब्त करिस: टेक्टर म बेल्डिंग करके बनाए गए रहिस जुगाड़
