रइपुर, 24 जुलाई 2021 शनिच्चर। मुख्यमंत्री दाउ भूपेश बघेल ह कहीन है कि सहकारी बैंक ले किसान मन अबड़ आसरा होथे। गंवई अर्थव्यवस्था ल स्वावलंबी बनाए बर सहकारिता आंदोलन के बढ़वार अउ एला अउ पोठ बनाए के आवश्यकता हवय। किसान मन के संगे—संग मजदूर, गौपालक, वनांचल के आदिवासी भाई-बहिनी मन ल तको सहकारी बैंक ले जोड़े जाना चाही, जेकर ले उन ल तको बैंक के सुविधा मन के लाभ मिल सकै। मुख्यमंत्री आज अपन घरू कार्यालय ले वीडियो कॉन्फ्रेंसिंग के माध्यम ले जिला सहकारी केंद्रीय बैंक राजनांदगांव के नवनियुक्त अध्यक्ष श्री नवाज खान के पदभार ग्रहण कार्यक्रम ल सम्बोधित करत रिहिन। मुख्यमंत्री ह बैंक के अध्यक्ष श्री खान ल नवा जिम्मेदारी मिले म बधई अउ शुभकामना दीन। मुख्यमंत्री ह ये बेरा म राजनांदगांव जिला के वनांचल के गांव मानपुर अउ मुढ़ीपार (खैरागढ़) म सहकारी बैंक के भवन निर्माण के घोषणा करीन। उन मन कहीन कि हरेक सहकारी बैंक के भवन निर्माण 36 लाख रूपिया के लागत ले करे जाही। कार्यक्रम के आयोजन राजनांदगांव के पद्मश्री गोविन्द राम निर्मलकर ऑडिटोरियम म करे गइस।
मुख्यमंत्री ह कहीन कि राज्य सरकार ह नरवा, गरूवा, घुरूवा, बाड़ी के नारा देहे हे, सुराजी गांव योजना के अंतर्गत पशु मन बर गौठान निर्माण करे गे हवय, जिहां महिला स्व-सहायता समूह के माइलोगन मन गोधन न्याय योजना के अंतर्गत खरीदे गए गोबर ले वर्मी कम्पोस्ट अउ सुपर कम्पोस्ट के निर्माण करत हावय। अब तक लगभग 9 लाख क्विंटल वर्मी कम्पोस्ट अउ सुपर कम्पोस्ट के बिक्री करे जा चुके हे, किसान मन के संगे —संग लोगन मन तको जैविक उत्पाद के उपयोग करे लगे हे।
