रायपुर, 20 फरवरी 2020। मुख्यमंत्री शहरी कार्यात्मक साक्षरता कार्यक्रम अंतर्गत आज नगर पालिका निगम दुर्ग परिक्षेत्र म ’गढ़बो डिजिटल छत्तीसगढ़’ के तहत साक्षरता भवन दुर्ग म ई-साक्षरता केन्द्र के शुभारंभ विधायक श्री अरूण वोरा कोति ले की-बोर्ड के बटन दबाके करे गीस। उमन ये बेरा म उपस्थित महिला मन ल संबोधित करत कहिन कि अभी हाल म संचार क्रांति के युग हे। ये मां सबो माता-बहनी मन ल डिजिटली साक्षर होना जरूरी हे। छत्तीसगढ़ सरकार के ये सबले नवाचारी कार्यक्रम हे। ये योजना बहुत अच्छा हे, एला हर एक वार्ड म चालू करे जाना चाही।
दुर्ग जिला म ये चौथइया केन्द्र ये। एखर पहिली नगर निगम भिलाई परिक्षेत्र म खुर्सीपार, नगर पंचायत पाटन अऊ नगर पंचायत उतई ई-साक्षरता केन्द्र चालू होए हे। ए केन्द्र मन म 14 ले 60 आयु वर्ग के माता-बहिनी मन ल डिजिटल साक्षर करे जात हे। येमा एक महिना के प्रशिक्षण अवधि होथे हे, जेमां 25-30 शिक्षार्थी मन के एक बैच संचालित होथे। प्रशिक्षण म निरधारित पाठ्यक्रम ल पूरा करे के बाद जिला स्तर म आनलाईन आंतरिक मूल्यांकन अऊ राज्य स्तर म बाह्यमूल्यांकन चिप्स कोति ले करे जाथे। ई-साक्षरता केन्द्र म नियुक्त प्रशिक्षित ई-एजुकेटर कोति ले प्रशिक्षण प्रदान करे जाथे। सफल शिक्षार्थी मन ल ऑनलाईन डिजिटल साक्षर होए के प्रमाण-पत्र प्रदान करे जाथे। योजना के लाभ शहरी क्षेत्र के कमजोर अऊ वंचित क्षेत्र के महिला मन ल मिलत हे। ओ मन दैनिक जीवन म एकर उपयोग कर तकनीकी रूप ले आत्मनिर्भर होके अपन जीवन ल अऊ जादा सरल अउर बेहतर बनावत हें। डिजिटल साक्षरता के अकतहा ए मन ल व्यक्तित्व विकास, श्रेष्ठ पालकत्व, वित्तीय, कानूनी, निर्वाचन साक्षरता, आत्मरक्षा, जीवन मूल्य, कौशल विकास जइसन महत्वपूर्ण विषय मन म कुशल प्रशिक्षित मनखे कोति ले प्रशिक्षण प्रदान करे जात हे।
राज्य साक्षरता मिशन प्राधिकरण के नोडल अधिकारी श्री प्रशांत पाण्डेय ह कार्यक्रम के विसय म बताइस कि गढ़बो नवा छत्तीसगढ़ के परिकल्पना ल साकार करे बर ये साक्षरता कार्यक्रम चालू करे गए हे। ’’डिजिटल साक्षर बनव, नवा छत्तीसगढ़ गढ़व’’ के नारा के संग उमन बताइन कि छत्तीसगढ़ राज्य म 36 केन्द्र मन के स्थापना मुख्यमंत्री के हाथ करे गए हे। कार्यक्रम के संचालन डॉ. रजनी नेलसन अऊ आभार प्रदर्शन सहायक संचालक श्रीमती पुष्पा पुरूषोत्तम ह करिस। ये बेरा म सहायक परियोजना समन्वयक श्री विवेक शर्मा, श्री आई.के. रामटेके अऊ डी.एम.सी.एस.एस.ए. श्री सुरेन्द्र पाण्डेय घलोक उपस्थित रहिन।
