गरियाबंद , गौरवपथ म बनही 33 नवा दुकान,पालिका के सामान्य सभा के बैठक म प्रस्ताव पास

गरियाबंद, 17 अक्टूबर 2020। नगर के गौरवपथ म जल्दी ही 33 नवा दुकान बनही। एखर बर पालिका के सामान्य सभा म एक करोड़ 25 लाख रुपिया के स्वीकृति देहे गेहे। एखर अलावा नगर म विभिन्न विकास कार्य बर दू करोड़ पांच लाख के विभिन्न निर्माण कार्य के सामान्य सभा के बैठक म परिषद ह अनुमोदन करिस। नगर पालिका अध्यक्ष अब्दुल गफ्फार मेमन ह जानकारी देवत हुए बतइस कि सामान्य सभा के बैठक म नगर के विकास ल लेके विभिन्न मुददा म चर्चा करत हुए सर्वसम्मती ले 3 करोड़ ले अधिक राशि के विकास कार्य के अनुमोदन करे गेहे। जेमा नगर के वार्ड क्रमांक 03 म गौरवपथ के समनांतर 33 नवा दुकान बनाय जाय के घलो प्रस्ताव पारित करके स्वीकृति देहे। ओमन बतइस कि नवा दुकान बनाय ले नगरवासी मन ल रोजगार हेतु दुकान उपलब्ध होही। एखर ले रोजगार घलो बढ़ही अउ गरीब तपके के लोगन मन ल रोजगार बर उचित जगह घलो उपलब्ध होही। नपा अध्यक्ष ह कहिन कि नवा दुकान बने ले गौरवपथ म घलो रौनक आही।