हीरा चलाथे चलत-फिरत किराना दुकान : समूह ले जुड़के बिसाईस छोटा हाथी

गरियाबंद, 12 जनवरी 2021। गरियाबंद के तीर-तखार के गांव अऊ बाजार मन म कहूं छोटा हाथी म चलत-फिरत दुकान दिख जाए अऊ वोला कोनो महिला कररत होवय त चौंक झन जाहू। ये हे मालगांव के हीरा निषाद, दरअसल जिला मुख्यालय गरियाबंद ले लगे ग्राम पंचायत मालगांव के श्रीमती हीरा निषाद आजकल छोटा हाथी (चार पहिया वाहन) ले किराना सामान के बिक्री करत हे। ओ ह छोटा हाथी म चलता फिरता दुकान के संचालन करत हे। बिहान के माताकृपा समूह के माध्यम ले एक साल पहिली दू लाख रूपिया के बैंक ले लोन लेके छोटा हाथी के गाड़ी खरीदिस। समूह के सहयोग ले अब ओ मन खुद बाजार म घुम-घुमके किराना अऊ आन सामान के बिक्री करत हे।
बिहान ले जुड़कर स्वावलंबन के रद्दा म चलइया हीरा निषाद ह योजना के अंतर्गत अपन आजीविका बर समूह के माध्यम ले साल 2016-17 म पहली पइत लोन लेके किराना दुकान खोलिस अऊ आस-पास के मनखे मन ल उचित मूल्य म सही सामान बेंचे लागिस। ओखर बाद लोन ल चुकाके बैंक ले फेर 1.50 लाख रूपिया लोन लेके खुद के दोना पत्तल मशीन खरीदके दोना पत्तल के व्यवसाय ले परिवार के सदस्य मन ल घलोक रोजगार उपलब्‍ध कराके घर परिवार के आर्थिक स्थिति ल मजबूती दीस। एखर अलावा मुर्गी पालन, बकरी पालन, बतख पालन, कबूतर पालन अऊ ग्रामीण स्तर म वनोपज संग्रहण के काम करके वो ह अपन आजीविका गतिविधि ल अऊ बजबूत करिस। तब समूह के सुझाव अनुसार जुन्ना सबो लोन मन ल चुकाके साल 2018-19 म दू लाख रूपिया के बैंक ले लोन लेके छोटा हाथी टाटा के गाड़ी खरीदीस। एखर से समूह म महिला मन के आत्माविश्वास बाढि़स अऊ उंकर व्यवसाय रफ्तार पकड़े लगिस। हीरा के लगन ल देखके घर वाले मन घलोक अब उंखर पूरा सहयोग करत हें। अब ऑटोमैटिक अगरबत्ती मेकिंग मशीन घलोक खरीद लेहे हें। जनपद पंचायत गरियाबंद के सीईओ श्रीमती शीतल बंसल ह बताइस के हीरा ल बिहान योजना के अंतर्गत उत्कृष्ट योगदान बर साल 2019 म 26 जनवरी के जिला कलेक्टर ह बेस्ट महिला कैडर के रूप मे सम्मानित घलोक कर डरे हे। एकर असर होइस के हीरा ले प्रेरणा लेके समूह के सबो दीदी अपना-अपना छोट मोट आजीविका शुरू करके स्वालम्बी बनत हें। समूह के सदस्य वनोपज के रूप म महुआ खरीदी अऊ शहद के बिक्री के काम घलोक करथें। ये साल दीवाली म इंकर समूह ह गोबर के दीया अऊ स्वास्तिक चिनहा बनाके विक्रय करिन। जेखर से आर्थिक लाभ घलोक होइस अऊ मनखे मन एला सहराईन घलोक।