गरियाबंद : मनरेगा ले मजदूर मन के हाथ म काम उहें किसान होइन खुशहाल

गरियाबंद, जिला म महात्मा गांधी नरेगा योजना अंतर्गत निर्मित व्यक्तिगत जमीन सुधार काम ले जिहां एक कोति मजदूर मन के हाथ म काम मिले हे, उहें जमीन सुधार काम ले किसान मन के खेत मन के पैदावारी बाढ़े हे। अइसनहेच एक किसान ग्राम घुटकुनवापारा के रहवईया परमानंद हे, जे ह अपन खेती के जमीन सुधार के धान फसल के पैदावारी बढ़ाए म सफलता हासिल करे हे। किसान परमानंद के किसानी जमीन सुधार बर पास काम ले गांव के 361 जॉब कार्डधारी मजदूर मन ल मनरेगा के तहत रोजगार मिले हे। ओ गांव म भरपूर खेती के जमीन हे, जेमां ले अधिकतर जमीन भर्री हे, जहॉ फसल के उत्पादन नाम मात्र होथे। ग्रामसभा के माध्यम ले गांव वाले मन ह कृषि जमीन सुधार के जानकारी लेके अपन कृषि जमीन म सुधार काम पास कराए म आगू आये हें।
जॉब कार्डधारी अऊ किसान परमानंद ह घलोक अपन जमीन म जमीन सुधार के काम कराए बर आवेदन करिन। जनपद पंचायत के माध्यम ले प्राक्कलन तियार कर प्रशासकीय स्वीकृति बर जिला पंचायत ल प्रस्तुत करे गीस। जेखर आधार म 1.03 लाख रूपिया के स्वीकृति देहे गीस। जनपद पंचायत के तकनीकी मार्गदर्शन ले गुणवत्तापूर्ण जमीन सुधार के काम करे गीस, जेमां खुद हितग्राही अऊ ऊंखर परिवार के मजदूर मन काम करिन।
किसान परमानंद निषाद ह बताइस कि पहिली वो रोजी-मजदूरी के संग खेती किसानी के काम करत रहिस। फेर भर्री जमीन होए ले ओ ल उचित लाभ नइ मिल पात रहिस। जमीन सुधार होए के बाद अब फसल के पैदावारी बाढ़े ले ओ ह आर्थिक रूप ले आत्मनिर्भर होए हे। किसान परमानंद ह जमीन सुधार काम होए के बाद अपन खेत म धान के फसल लगाइस अऊ मेड़ म तिली के फसल लगाके आज अपन आय ल दुगुना कर लेहे हे।