गरियाबंद, प्रदेश म राष्ट्रीय स्तर म पहली पइत राष्ट्रीय आदिवासी नृत्य महोत्सव 2019 (नेशनल ट्राइबल डान्स फेस्ट) के आयोजन ये महीना के 27 तारीक के रायपुर म शुरू होही। आकरे कड़ी के रूप म गरियाबंद जिला के मैनपुर म राष्ट्रीय आदिवासी नृत्य महोत्सव आयोजन के तैयारी बर संभाग स्तरीय प्रतियोगिता के आयोजन करे गीस। जेमां रायपुर संभाग के धमतरी, महासमुंद, बलौदाबाजार अऊ गरियाबंद जिला के 11 दल मन ह अपन प्रतिभा के प्रदर्शन करिन। कलाकर मन ह अपन गीत अउ नृत्य के माध्यम ले आदिवासी संस्कृति, रीति-रिवाज, पूजा-अर्चना के प्रदर्शन करिन।
महोत्सव म सरगुजा क्षेत्र आदिवासी विकास प्राधिकरण के उपाध्यक्ष, राज्य मंत्री श्री गुलाब कमरो घलोक सामिल होइन। संभाग स्तरीय ये आयोजन म बलौदाबाजार जिला ले जय बगदाई सुवा नृत्य दल, खैरादाई सुवा दल केसला, धमतरी जिला ले शासकीय महाविद्यालय धमतरी के कलाकारों कोति ले फसल कटाई, जय गढ़िया बाघा आदिवासी लोकनृत्य दल, नेहरू युवा केन्द्र धमतरी परब गीत नृत्य, जय निरई माता दल, महासमुंद जिला ले जय गौरा-गौरी सुआ नृत्य दल छपोराडीह, जय मां शमलेश्वरी कर्मा पार्टी बेलडीह अऊ गरियाबंद जिला ले जय बुढ़ादेव मादरी दल कोकड़ी-मैनपुर, कमार नृत्य दल देवरी विवाह नृत्य अऊ भुंजिया नृत्य दल टेंवारी के कलाकार मन ह अपन प्रस्तुति दीन।