बिलासपुर जिला के गौठान म वर्मी कम्पोस्ट खाद के आय ले उत्साहित हे समूह के महिला मन

बिलासपुर, मरवाही विकासखंड के ग्राम गुल्लीडांड़ के आदर्श गौठान म स्व-सहायता समूह के महिला मन गौठान म सकेले गए गोबर ले वर्मी कम्पोस्ट खाद बनाके बिक्री करत हें। ऊंखर कोति ले निर्मित खाद ल मार्केट घलोक मिलत हे। जेखर से महिला मन उत्साहित हे। गौठान म करीबन 30 क्विंटल वर्मी कम्पोस्ट उत्पादन अऊ विक्रय करे जा चुके हे।
गौठान म महामाया महिला स्व-सहायता समूह कोति ले वर्मी कम्पोस्ट खाद बनाए के काम करे जात हे। शुरूआत म ए महिला मन ह 21 क्विंटल वर्मी खाद के उत्पादन करिन। जऊन हाथों-हाथ बिक गए। अभी तक गौठान म महिला मन कोति ले करीबन 3 हजार किलोग्राम वर्मी खाद के उत्पादन करे जा चुके हे। जेखर से 19 हजार रूपिया ले जादा के आय होए हे। गौठान ले लगे बाड़ी म ए महिला मन कोति ले जैविक साग भाजी के उत्पादन घलोक करे जात हे। ये जैविक खाद के खरीदी कृषि अऊ उद्यानिकी विभाग करहीं। गांव वाले मन ल ईंधन के वैकल्पिक सुविधा बर गौठान म बायो गैस प्लांट के स्थापना घलोक करे जात हे।
गौठान ले लगे करीबन 1 एकड़ बाड़ी म ममता महिला स्व-सहायता समूह कोति ले साग भाजी के उत्पादन करे जात हे। बाड़ी म गौठान ले मिले वर्मी खाद के उपयोग करके मेथी, पालक, लालभाजी, धनिया उगाए जात हे। जेखर से जैविक भाजी के स्वाद मनखे मन ल मिलही। ए महिला मन के मांग म कलेक्टर कोति ले आलू, जिमीकंद, गाजर, मूली, शलजम के बीज अऊ पौधा ओ मन ल देहे जात हे।
उद्यानिकी विभाग कोति ले वर्मी खाद उत्पादन करइया महिला मन ल निःशुल्क तौल कांटा, वर्मी बेड अऊ ड्रम प्रदान करे गीस। गौठान म करीब 8 एकड़ ले जादा क्षेत्र म चारागाह विकास करे गए हे। जेखर से गौठान म अवइया मवेसी मन ल भरपूर चारा मिलत हे। गौठान म उत्पादित 10 टन ले जादा हरियर चारा पशु आहार बर कटाई होवइया हे।
गौठान म अभी रोजेच करीबन 250 पशु आथें। ये गौठान के फेंसींग बर महिला स्व-सहायता समूह कोति ले फेंसींग पोल के आपूर्ति करे गीस। कृषि विभाग कोति ले 5 वर्मी बेड्स अऊ 2 नाडेप टांके जैविक खाद निर्माण बर स्थापित करे गए हे।