दंतेवाड़ा: गाय शेड बने ले गरूआ मन के होइस रखरखाव आसान

दंतेवाड़ा, 20 फरवरी 2024। पशुपालन व्यवसाय म दुध अउ खाद निर्माण बर पशु मन बर चारा के व्यवस्था, टीकाकरण संग आन देखभाल जतका जरूरी हे वोतकेच जरूरी पशु मन बर उत्तम रहवास के व्यवस्था करना ह हे। मने पशुधन प्रबंधन के तहत पशु मन के रहे जगा के घलोक ध्यान रखे जाना पशुपालक मन बर अनिवार्य होथे। जेमां रोजाना साफ -सफाई, पशु संख्या के मुताबिक बने जगा अऊ खुला हवादार कोठा, पशु अपशिष्ट के निकासी अऊ धूप वर्षा ले बचाव के समुचित प्रबंधन होना चाही। आमतौर म स्थानीय ग्रामीण क्षेत्र मन म पशु मन के रहे के जउन ल स्थानीय बोली म ’’कोठा’’ कहे जाथे। बने सहिन कोठा नी होए ले पशुधन उपर प्रतिकूल प्रभाव परथे संगेच ओमां पशु जनित रोग पनपे के संभावना घलोक बाढ़ जाथे अऊ दुध उत्पादन क्षमता घलोक कम होए लगथे। दही कड़ी म महात्मा गांधी रोजगार गारंटी योजना (मनरेगा) के तहत बनाए जात गाय शेड निर्माण ले पशुपालक मन ल गौवंश के रखरखाव म सुविधा मिले हे। ब्लॉक कुआकोण्डा ग्राम हल्बारास के निवासी पशुपालक सुखराम ल घलोक मनरेगा अन्तर्गत पशुपालन ल आय के साधन के रूप म विकसित करे बर गाय शेड निर्माण बर 1 लाख 28 हजार के राशि साल 2021-22 म देहे गए रहिस। ए संबंध म सुखराम ह बताइस कि वो ग्रामीण परिवेश म रहके खेती-बाड़ी के माध्यम ले अपन आजीविका चलाथे, फेर आमदनी बने नइ होए के सेती बड़ मुस्‍कल म जीवन कटत रहिस। आय के संचय अउ बचत के तो सवालेच नइ रहिस। ओखर तिर गौवंश बनेच रहिस, फेर वोखर बर उचित रहवास अऊ रखरखाव के व्यवस्था करना घलोक एक बड़का समस्या रहिस।
अइसन स्थिति म सुखराम ल ग्राम पंचायत म होवइया ग्राम सभा म ए बात के जानकारी मिलीस कि पंचायत अउ ग्रामीण विकास विभाग से संचालित योजना मन के महत्वपूर्ण योजना मनरेगा यानी महात्मा गांधी राष्ट्रीय ग्रामीण रोजगार गारंटी योजना ले हितग्राही मन ल गाय शेड निर्माण काम से लाभान्वित करे जात हे। एखर जानकारी होतेच ओ ह ए योजना के लाभ लेहे के ठानीस अऊ ग्राम सभा ले गाय गोठान निर्माण बर प्रस्ताव ग्राम पंचायत ले पारित करे के संग काम बर निर्माण क्षेत्र के नक्शा खसरा के जानकारी पंचायत के माध्यम ले जनपद पंचायत कुआकोण्डा के मनरेगा शाखा ल देहे गीस। कुछेक दिन म मुख्य कार्यपालन अधिकारी जिला पंचायत दंतेवाड़ा ले 1.28 (एक लाख अठ्ठाईस हजार रूपये) के प्रशासकीय स्वीकृति मिलिस।
पशु शेड निर्माण के के बाद सुखराम के एक बड़का समस्या दूर हो गे अऊ ओ हर अपन गाय मन ल गाय शेड म रखना शुरू कर दीस सबले बड़े सुविधा ये के अब ओला गाय मन के संग एती-ओती भटके के जरूरत नइ होवय संगेच गाय मन के एक जगा म रहे ले ऊंखर गोबर ले खाद घलोक बनत हे। एखर अलावा, बारिश, धूप अउ आन जीव अउ चोरी अउ पशु मन ल आन माध्यम ले होवइया नुकसान ले घलोक बचाव अब संभव हे।