गौरेला पेंड्रा मरवाही : सरसों के खेती ले आर्थिक लाभ कमावत हे नवागांव के रामेश्वर

गौरेला पेंड्रा मरवाही, सरसों के खेती करके नवागांव के रामेश्वर आर्थिक लाभ कमावत हे। जिला के पेंड्रा विकासखंड के ग्राम नवागांव निवासी किसान रामेश्वर के बताती वोखर पास खेती के लइक कुल जमीन 11 एकड़ हे। जेमां वो ह रबी के मौसम म पाछू कई बछर ले 6 एकड़ मे गेहूं के खेती करत रहिस। जेखर से ओ ल 5.6 क्विंटल प्रति एकड़ उपज मिलत रहिस अऊ गेहूं के खेती ले ओ ल लागत घलोक जादा आत रहिस।
कृषि विभाग कोति ले ओ ल जानकारी मिलिस के सरसों के खेती म कम लागत ले जादा उपज मिलथे। ग्रामीण कृषि विस्तार अधिकारी के माध्यम ले बीज ग्राम योजना के तहत किसान रामेश्वर ल सरसों बीज किसिम छत्तीसगढ़ सरसों प्रमाणित बीज 50% अनुदान म देहे गीस। जेखर से किसान ह अपन 1 एकड़ जमीन म सरसों के खेती करिस। किसान ह खेत म अपन घर के वर्मी कंपोस्ट अऊ कंपोस्ट खाद के उपयोग करिस, जबकि पहिली गेहूं के खेती बर रासायनिक खाद बिसाए ल परय जेखर से लागत घलोक जादा आत रहिस। अब एक एकड़ जमीन म सरसों के खेती बर ओ ल मात्र 3000 रुपिया लागत आए हे अऊ ओ ल एक एकड़ ले 3 क्विंटल सरसों मिले हे। ये प्रकार ले लागत मूल्य काटके ओ ल 15000 रुपिया के शुद्ध आय प्राप्त होए हे। वो ह आन किसान मन ले घलोक अनुरोध करे हे कि तेल के मिलावट ले होवइया कई ठन बीमारी मन ले बचे बर अपन घरे म तिलहन के खेती जरूर करव, जेखर से स्वास्थ्य अऊ आर्थिक लाभ मिल सकय अऊ जमीन के उर्वरक क्षमता घलोक बने बने रहय।