गौरेला-पेंड्रा-मरवाही, छत्तीसगढ़ म विष्णुदेव साय सरकार के संवेदनशील नीति मन ले ग्रामीण महिला मन के जीवन म नवा आत्मविश्वास अऊ सम्मान जुड़त हे। प्रधानमंत्री आवास योजना (ग्रामीण) ह पेंड्रा जनपद के ग्राम पंचायत दमदम के सुमित्रा कोर्राम जइसे बहुत अकन महिला मन के पक्का घर के सपना साकार करे हे। पहिली माटी के घर म रहइया सुमित्रा के परिवार बरसा अऊ जाड़ म असुरक्षित महसूस करत रहिन, फेर अब पक्का घर के संग ओ मन ल सुरक्षा अऊ गरिमा दुनों मिले हे।
योजना के तहत ओ ल घर बनवाए खातिर वित्तीय सहायता मिले हे अऊ पंचायत सचिव अऊ ग्रामीण विकास विभाग के सहयोग ले घर बेरा म पूरा होय हे। सुमित्रा ह खुदे अपन घर म काम करके मनरेगा के अंतर्गत 90 दिन के मजदूरी कमाए हे, जेखर से ओ ल अकतहा आमदनी मिले हे। ओखर कहना हे के अब परिवार खातिर सुरक्षित आशियाना अऊ लइका मन के पढ़े बर बेहतर वातावरण मिले हे।
राज्य सरकार के लक्ष्य गांव वाले मन के जीवनस्तर म सुधार लाना अऊ हर पात्र परिवार ल पक्का घर उपलब्ध कराना हे। योजना के तहत पात्र हितग्राही मन ल वित्तीय सहायता, निर्माण सामान, तकनीकी सहयोग अऊ रोजगार के अवसर उपलब्ध कराए जात हे।
विष्णुदेव साय सरकार के अगुवई म “हर गरीब के सिर म मजबूत छत” के लक्ष्य तेजी ले साकार होवत हे। सुमित्रा जइसे महिला मन के सफलता के कहानी मन ए बात के प्रमाण हे के ये योजना सिरिफ घर निर्माण भर नो हे, भलुक ग्रामीण आत्मनिर्भरता अऊ सशक्तिकरण के दिशा म एक सशक्त कदम हे।
गांव के महिला मन के मूड़ उपर पक्की छत, आत्मनिर्भरता के नवा आधार
