महासमुंद म कोरोना संकट के बेरा म गौठान बाड़ी बनिस आजीविका के साधन

महासमुंद, 24 अप्रैल 2020। राज्य शासन के महत्वाकांक्षी योजना नरवा, गरूवा, घुरवा, बाड़ी योजनांतर्गत जिला पंचायत महासमुंद कोति ले बसना विधानसभा क्षेत्र के अंतर्गत ग्राम नवागांव अऊ गनेकेरा म माडल गौठान के निर्माण करे गए हे। जिला पंचयात के ए.पी.ओ. श्री प्रथम अग्रवाल के बताती गौठान म रोजेच करीबन 100 ले 120 पशु आवत हें, गौठान म पानी टंकी अऊ कोटना बनाए गए हे। जेला रोजेच साफ-सफाई करके पशु मन ल साफ पानी पियाए जात हे, गौठान म बोर के सुविधा उपलब्‍ध हे, गौठान म तीन स्व-सहायता समूह ल रोजगार मिले हे।

गौठान म 17 वर्मी बेड लगे हे, जेमां अभी हाल म सबो बेड भरे हे अऊ खाद बनाए जात हे। समूह ह कुल 100 कुंटल खाद तियार करके 40 क्विंटल खाद बिक्री कर डरे हे, अउ 60 क्विंटल बिक्री बर तियार हे। स्व-सहायता समूह ल खाद ले 15 हजार के आमदनी हो गे हे, जेखर पैसा ओ समूह के खाता म जमा हो गए हे, खाद तियार करे म समूह ह रूचि लेत हे। एखर से अऊ आन समूह घलोक ये मां रूचि लेके काम करे के सोचत हे। गौठान के आगू 10 एकड़ चारागाह के बनाए गए हे। चारागाह म ज्योति अऊ कस्तूरबा स्व-सहायता समूह ह बाड़ी विकास के काम करे हे, जेमां भिंडी, करेला, लौकी, खीरा, भाजी, भाटा, टमाटर संग आन साग-भाजी लगे हे।

गोठान म साग-भाजी लगाए ले समूह के आय म बढ़ोतरी होए हे, जऊन ये कोरोना संकट माहमारी के स्थिति म गांव वाले मन के खाद्य आपूर्ति म अहम भूमिका निभावत हे। गौठान म मछली पालन अऊ जल स्टोरेज बर भू-तल जल भण्डार टैंक तको बनाए जात हे अऊ चारागाह म सिंचाई बर ड्रीप इरीगेशन के काम करे जात हे। गौठान बने के बाद नवागांव म पशु मन के संख्या बढ़के 189 हो गे हे। गौठान म पशु विभाग ह समय-समय म पसु मन के उपचार करत हें, जिहां 63 पशु मन के कृत्रिम गर्भाधान 33 पशु मन के बधिया करण अऊ 561 पशु मन के टीकाकरण करे गए हे, जेमां खुराचपका, गलघोटू सामिल हे अऊ 327 पश मन के उपचार होए हे। गौठान के उचित रूप ले संचालन अऊ देखरेख सुचारू रूप ले करे जात हे। एखर से गनेकेरा अऊ नवागांव के ग्रामीण उत्साहित हें।