- पोड़ी गौठान म 30 ले जादा महिला मन कई अजीविकामूलक गतिविधि मन ले जुडि़न
- कलेक्टर ह ग्राम पोड़ी अउ रजौली गौठान के करिन निरीक्षण, आजीविका गतिविधि मन के विसय म महिला मन ले लीन जानकारी
- पोड़ी गौठान म वर्मी कम्पोस्ट विक्रय ले साक्षर स्व सहायता समूह के महिला मन ल मिलीस 1 लाख 87 हजार रुपए के लाभांश
कोरिया, कलेक्टर श्री कुलदीप शर्मा अउ जिला पंचायत सीईओ श्री कुणाल दुदावत ह १३ तारक के विकासखण्ड सोनहत दौरा के समय पोड़ी अउ रजौली गौठान के निरीक्षण करिन। ये बेरा म उमन स्व सहायता समूह के महिला मन ले गौठान म संचालित आजीविका मूलक गतिविधि के संचालन, आमदनी अउ गौठान के व्यवस्था मन के अवलोकन करिन। पोड़ी गौठान म स्वसहायता समूह के महिला मन अलग-अलग आजीविका मूलक गतिविधि संचालित करत हे। जेमें 30 ले जादा महिला मन ल आय के साधन मिले हे। गौठान म वर्मी कम्पोस्ट अऊ केंचुआ उत्पादन, किचन गार्डन बर बैंगन, टमाटर आदि के पौधा तियार करना, मशरूम उत्पादन, बकरी पालन जइसे काम करे जात हे। जल्दीच मुर्गी पालन घलोक महिला मन शुरू करइया हें। एखर बर शेड तियार हो गए हे।
कलेक्टर ह वर्मी खाद अउ केंचुआ निर्माण करइया साक्षर महिला स्व सहायता समूह के महिला मन ले लाभांश उपर बात करिन त उमन बताइन कि महिला मन ल अब तक 1 लाख 87 हजार रुपिया के लाभ होए हे। कलेक्टर श्री शर्मा ह उद्यानिकी विभाग ल गौठान म सामुदायिक बाड़ी व्यवस्था ल सुदृढ करे के निर्देश दीन।
अइसनहे रजौली गौठान अउ सामुदायिक बाड़ी म निरीक्षण के समय कलेक्टर श्री शर्मा ह महिला मन ले बात करके गतिविधि मन के बारे म जानकारी लीन। उमन पशु चिकित्सा विभाग के अधिकारी मन ल गौठान म जल्दीच मुर्गी पालन शुरू करे अउ बकरी मन के संख्या म बढ़ोतरी कराए के हुकुम दीन। सामुदायिक बाड़ी म करेला, बरबट्टी, लौकी जइसे सब्जि लगाए अउ हल्दी, लहसुन, अदरक के उत्पादन करे ल कहिन। उमन उद्यानिकी विभाग के अधिकारी मन ल जिला म गौठान मन के चिन्हारी करके नींबू के पौधा लगाए के योजना बनाए के निर्देश दीन।
बिहान वेयर हाउस अउ प्रोसेसिंग सेंटर के करिस अवलोकन
बिहान वेयर हाउस अउ प्रोसेसिंग सेंटर के निरीक्षण के समय कलेक्टर श्री शर्मा ह उपस्थित महिला मन ले सेंटर म उत्पाद मन के निर्माण, कार्ययोजना, मार्केटिंग आदि उपर बात करिन। उमन मशरूम उत्पादन, खाद निर्माण यूनिट, कम्पोस्टिंग के अवलोकन करिन। समूह के महिला मन ह बताइन कि इहां 2 हजार मशरूम बैग के क्षमता हे। कलेक्टर श्री शर्मा ह राज्य ग्रामीण आजीविका मिशन के अधिकारी मन ल 1 हफ्ता के भीतर मशरूम रूम निर्माण पूरा करे के हुकुम दीन।