चौपाल म बइठके गांव वाले मन ले करिन गोठ-बात
गढ़बो नवा छत्तीसगढ़ के संकल्पना ल साकार करही सुराजी गांव योजना
महासमुन्द, जिला म ये योजना के पहिली चरण म गांव मन म मॉडल गौठान के निर्माण करे जात हे। गौठान मन ले लगे खुला जगा म चारागाह के विकास घलोक करे जात हे। राज्यसभा सांसद श्री पी.एल.पुनिया के संग उद्योग मंत्री श्री लखमा अऊ नगरीय प्रशासन मंत्री डॉ. डहरिया आज महासमुन्द जिला के कछारडीह अऊ रायपुर जिला के नवागाँव म निर्माणाधीन मॉडल गौठान म भ्रमण करिन। उहां पशु मन बर बनाए जात गौठान अऊ आन काम मन के जानकारी लीन।
राज्यसभा सांसद श्री पी. एल. पुनिया ह गांव के चौपाल म बइठके गांव वाले मन ले ये योजना के क्रियान्वयन ले जुड़े कई ठन मुद्दा मन उपर चर्चा करिन अऊ उंखर से ये योजना म सक्रिय भागरीदारी के आव्हान करिन। उमन कहिन कि देश के 70 प्रतिशत आबादी गाँव म निवास करथे ग्रामीण अर्थव्यवस्था के विकास बर छत्तीसगढ़ सरकार ह अच्छा उदीम करे हे। अभी हाले म बडे़ शहर मन म केमिकल मुक्त राशन, साग भाजी के माँग बाढ़े हे। राज्य सरकार के ये योजना ले खेती – किसानी म जैविक खाद के उपयोग ले जैविक फसल मन के उत्पादन होही उन्हें रासायनिक खाद उपर निर्भरता कम होही। योजना के सफलता बर सरकार के संगें-संग आम जनता के घलोक सहयोग जरूरी हे।
मंत्री डॉ.शिव डहरिया ह कहिन कि योजना छत्तीसगढ़ के संस्कृति अऊ परंपरा ल सहजे बर महत्वपूर्ण योजना हे। एखर से बनइया गौठान मन ले जिहां एक तरफ गांव मन म समृद्धि आही, उन्हें ये ह, गांव वाले मन के आर्थिक सशक्तिकरण के दिशा म घलोक कारगार साबित होही। मंत्री श्री कवासी लखमा ह कहिन कि ये योजना के चर्चा देश-विदेश म होवत हे। खेती-किसानी ल मजबूत बनाए अऊ पशुधन संवर्धन के संगें-संग स्थानीय गांव वाले मन ल अकतहा आमदनी के जरिया देवाए म ये योजना कारगर होही। विधायक श्री धनेद्र साहू ह कहिन कि सरकार के ये महत्वकांक्षी योजना ले रासायनिक खाद अऊ कीटनाशक मन के उपयोग कम करके जैविक खाद के उपयोग ल बढा़वा दे जाही। ये बेरा म विधायक मोहन मरकाम ह घलोक मनखे मन ल सम्बोधित करिन। गांव वाले मन ले चर्चा के समय जिला पंचायत अध्यक्ष श्रीमती शारदा वर्मा, ग्राम कछारडीह अऊ ग्राम नवागाँव के सरपंच संग रायपुर कलेक्टर डॉ. एस भारतीदासन, जिला पंचायत सीईओ श्री गौरव कुमार सिंह अऊ आन गणमान्य मनखे अऊ ग्रामीणजन उपस्थित रहिन।
