जगदलपुर म महिला मन बर आय के जरिया बनिस गोठान : आदर्श गोठान भोंड के महिला मन 20 रूपिया किलो म बेचत हें वर्मी कम्पोस्ट

जगदलपुर, राज्य शासन के सुराजी गांव योजना नरवा, घुरवा, गुरुआ अऊ बाड़ी के असल फायदा अब गांव वाले मन ल मिले लगे हे। बस्तर विकासखंड के ग्राम भोंड म बने आदर्श गोठान ले न केवल गांव वाले मन ल सुविधा होए हे भलुक एखर से जुड़े महिला स्व-सहायता समूह ल आर्थिक लाभ घलोक होए लगे हे।
मुख्यमंत्री श्री भूपेश बघेल ह 31 मई के दिन भोंड आदर्श गोठान के लोकार्पण करे रहिन। ओखर बाद ये गोठान म आर्थिंक गतिविधि बढ़ गीस। गांव के तीन महिला स्व-सहायता समूह के सक्रिय सदस्य मन ल मिलाके 25 महिला मन के एक अलग समिति बनाए गए हे। ये गोठान म वर्मी कम्पोस्ट के 8 टांका बनाये गे हे, जेमां ले चार टांका म वर्मी कम्पोस्ट तियार हो गए हे। समूह के महिला मन अभी एक टांका ले खाद निकाल के पैकिंग करत हें। समूह के सदस्य श्रीमती तुलावती मौर्य ह बताइस कि अभी एक टैंक के आधा खाद निकाले गए हे अऊ ओखर पैकिंग होत हे। उमन बताइस कि वर्मी कम्पोस्ट 20 रूपिया प्रति किलो के दर ले बेचे जात हे। अब तक 40 किलो खाद बेचे गे हे। समूह के महिला मन ह बताइस कि एक टैंक म एक पइत म 6 ले 7 क्विंटल खाद निकलथे अऊ साल म तीन पइत टैंक ले खाद निकाले जा सकत हे। एमा ले साल भर म करीबन सौ ले सवा सौ क्विंटल खाद निकलही, जेखर से साल म केवल खाद ले करीबन 2 लाख रूपिया के आय होही। जनपद पंचायत बस्तर के अधिकारी मन ह बताइन कि अभी येला साग भाजी लगवइया किसान ही खरीदत हें। जादा खाद होए म सहकारी समिति के माध्यम ले घलोक खाद बेचे के योजना हे। समूह के महिला मन ह बताइस कि खाद बनाए के संगेच गोठान के खाली जगा म साग भाजी लगाय के तैयारी करत हे, एखर से घलोक समिति ल आर्थिक लाभ होही।
भोंड के सरपंच श्री गणेश बघेल ह बताइस कि गोठान ले गांव वाले मन ल सुविधा हो गए हे। उंखर मवेसी मन बर चरवाहा मिल गए हे। उमन बताइस अभी तो सबो जगा बहुत चारा अऊ पानी हवय। गर्मी म मवेसी मन ल चारा अऊ पानी बर दिक्कत होत रहिस, फेर ये गर्मी म ये दिक्कत नइ होही। गोठान म ही चारा अऊ पानी के बहुत व्यवस्था हे। उमन बताइस कि गांव के सबो किसान मन ले कहे गए हे कि ओ मन खेत ले निकलइया पैरा ल गौठान म रखयं अऊ जऊन किसान गोठान तक पैरा नइ ला सकही, समिति ऊंखर खेत ले पैरा ल गोठान तक लाही।