रायपुर, छत्तीसगढ़ शासन कोति ले नागरिक मन ल जादा गुणवत्ता के जेनेरिक दवई सस्ता कीमत म बेंचे जात हे। एखर बर राज्य के सबो नगरीय निकाय मन म श्री धनवंतरी जेनेरिक मेडिकल स्टोर योजना के तहत जेनेरिक दवई के दुकान के संचालन करे जात हे। ए दुकान मन म देश के ख्याति प्राप्त कंपनी मन के जेनेरिक दवई मन म 50 ले 70 प्रतिशत तक के छूट देहे जात हे। धनवन्तरी दवा दुकन मन म सर्दी, खांसी, बुखार, ब्लड प्रेशर, इन्सुलिन के संग गंभीर बीमारी मन के दवा, एंटीबायोटिक, सर्जिकल आईटम घलोक रियायती मूल्य म जरूरतमंद ल उपलब्ध कराए जात हे।
नगरीय प्रशासन अउ विकास विभाग कोति ले श्री धनवंतरी जेनेरिक मेडिकल स्टोर योजना 20 अकटूबर 2021 ले शुरू करे गए रहिस हे। योजना के तहत राज्य के जम्मो 169 नगरीय निकाय मन म 190 श्री धनवंतरी मेडिकल स्टोर खोले गए हे। नगरीय निकाय मन म करीब 194 दुकान के चिन्हारी करे गीस। शासकीय चिकित्सक मन ल अस्पताल म इलाज बर अवइया मरीज मन ल जेनेरिक दवई लिखना अनिवार्य करे गीस। योजना ले अब तक 72 करोड़ रूपिया एम.आर.पी. के दवई मन के बिक्री म 44 करोड़ रूपिया के छूट जरूरतमंद मनखे मन ल देहे गए हे। जेखर से मनखे मन ल अड़बड़ राहत मिले हे अऊ सस्ता म दवा मिले ले जनता के बचत होवत हे।
जेनेरिक दवई मन ले नागरिक मन ल 44 करोड़ ले जादा के होइस बचत
