घर म पानी मिले ले महिला मन के चेहरा म झलकिस खुशी

बिलासपुर, 30 अगस्त 2021। जल जीवन मिशन योजना के तहत अब दूरदराज के गांव मन म मनखे मन ल पीए बर साफ पानी ऊंखर घर तक नल कनेक्शन देके पहुंचाए जात हे। ये योजना के तहत जिला के हरेक गांव के हरेक घर म नल कनेक्शन देहे जाही। ये योजना के तहत बिलासपुर जिला के विकासखंड तखतपुर के ग्राम पंचायत लाखासार के गड़रियापारा म सोलर पंप के माध्यम ले घर-घर नल ले शुद्ध पेयजल के आपूर्ति करे जात हे। जल जीवन मिशन के अंतर्गत ग्राम गड़रियापारा म 23.26 लाख के लागत ले 244 जनसंख्या वाले ये गांव के 30 म ले 13 घर म नल लग गए हे बांचे काम प्रगति म हे। अब इहां घर-घर नल ले शुद्ध पेयजल के आपूर्ति करे जात हे।
अइसनहे ग्राम पंचायत लाखासार म 1 करोड़ 6 लाख 99 हजार रूपिया के लागत ले रेट्रोफिटिंग योजना शुरु करे गए हे जेखर तहत 80 किलोलीटर व 75 किलोलीटर क्षमता के दू ओवरहेड टैंक बनाए गए हे। इहां दू जोन बनाके पाइप लाइन के विस्तार घलोक करे जात हे। एखर से लाखासार गांव के 401 घर म नल ले पानी पहुंचेही।
जल जीवन मिशन ले लाभान्वित श्रीमती मीनाक्षी पॉल, श्रीमती जोविधा पॉल अऊ श्रीमती अंजनी पॉल ह बताइस के पहिली ओ मन ल गली म लगे सार्वजनिक हैण्डपम्प ले पानी लाना परत रहिस, अऊ घर तक पानी ढोके लाय म परेशानी घलोक होत रहिस। कई पईत भीड़ होए के सेती लंबा लेन म घलोक लगना परत रहिस, संगेच बरसात के दिन म परेशानी अऊ बाढ़ जात रहिस। हमार छोटे-छोटे लइका हें, जे मन ल घर म छोड़के जाना परत रहिस। अब हमार घरे म नल ले पानी मिले ले हमला अड़बड़ राहत मिले हे। गांवेच के दिलहरण अऊ सीताराम के कहिना हे के घर-घर म नल लग जाय ले समय के बचत तो होतेच हे, एखर से काम म निकले अऊ घर के देखभाल करे म घलोक सुविधा होवत हे। मुख्यमंत्री श्री भूपेश बघेल अऊ लोक स्वास्थ्य यांत्रिकी मंत्री गुरु रुद्रकुमार ल ग्रामीण महिला मन ह धन्यवाद देवत ऊंखर प्रति आभार व्यक्त करे हें।
लोक स्वास्थ्य यांत्रिकी विभाग के अधिकारी मन ह बताइस के अब तक केवल शहरी क्षेत्र मन म नल जल योजना ले पेयजल उपलब्‍ध होत रहिस। अवइया साल मार्च महिना तक एक लाख घर मन म कनेक्शन देहे के लक्ष्य रखे गए हे अऊ अभी तक 4 हजार घर के भीतर नल कनेक्शन देहे गए हे। ये कनेक्शन स्कूल अऊ आंगनबाड़ी केन्द्र मन म घलोक देहे जात हे। उमन बताइन के योजना के तहत गांव मन म जल परीक्षण घलोक करे जात हे। जल जीवन मिशन के अंतर्गत पानी के गुणवत्ता के नियमित जांच कर शुद्ध पेयजल के आपूर्ति सुनिश्चित करे जात हे।