2008 ले गांव वाले मन करत रहिन मांग
उत्साहित गांव वाले मन ह कैम्प कार्यालय पहुंच के जताइन आभार
जशपुरनगर, मुख्यमंत्री विष्णुदेव साय के पहल म राज्य सरकार ह घासीमुंडा गांव ल राजस्व ग्राम घोषित कर देहे हे। अपन 16 साल जुन्ना मांग पूरा होए ले घांसीमुंडा गांव के रहवासी प्रसन्न हे। गांव वाले मन ह सीएम कैम्प कार्यालय पहुंच के मुख्यमंत्री विष्णुदेव साय के आभार जताए हें। क्षेत्र के बीडीसी सरिता पैंकरा ह बताइस के घांसीमुंडा गांव ल राजस्व ग्राम बनाए बर स्थानीय रहवासी लंबा समय ले संघर्ष करत रहिन। एखर बर ग्रामीण एकजुट हो के सांसद रहे के समय मुख्यमंत्री विष्णुदेव साय ले अनुरोध करे रहिन। मुख्यमंत्री साय ह ए दिशा म सरलग उदीम करत रहिन। मुख्यमंत्री बने के बाद उमन घासीमुंडा के रहवासी मन ले करे गे वादा ल निभात,राजस्व ग्राम घोषित कर दीन। पूर्व सरपंच विशेष्वर साय ह बताइस के घांसीमुंडा ल राजस्व ग्राम घोषित करे ले ए गांव के 2778 मनखे मन ल लाभ मिलही। गांव म पटवारी कार्यालय शुरू हो जाय ले मनखे मन ल छोटे छोटे काम बर दौउड़ लगाय ले छुटकारा मिल जाही। गांव के सियान बैजनाथ साय ह मुख्यमंत्री विष्णुदेव साय के आभार जतात कहिस के मुख्यमंत्री के पहल ले वाखर बरसों जुन्ना मांग पूरा हो गए हे। एकर लाभ गांव के सबो मनखे मन ल मिलही। घांसीमुंडा ल राजस्व ग्राम घोषित करे के बाद जिला म राजस्व गांव मन के संख्या बाढ़ के 770 हो गए हे। भू अभिलेख शाखा से आखरी प्रकाशन आदेश के अनुसार राजस्व ग्राम के संख्या फरसाबहार ब्लाक म 101 अऊ जिला म 770 हो गए हे। राजस्व ग्राम घोषित ए गांव के जनसंख्या 2718,खसरा नम्बर के संख्या 943 अऊ क्षेत्रफल 1066 हेक्टेयर हे।
