देश के आजादी अऊ नव निर्माण म स्वर्गीय श्री घनश्याम सिंह गुप्त के बहुमूल्य योगदान: मुख्यमंत्री श्री भूपेश बघेल

रायपुर, मुख्यमंत्री श्री भूपेश बघेल आज बिहनिया अपन निवास कार्यालय म स्वतंत्रता संग्राम सेनानी अऊ संविधान निर्माण सभा के हिन्दी ड्रॉफ्ट कमेटी के अध्यक्ष स्वर्गीय श्री घनश्याम सिंह गुप्त के जयंती समारोह म सामिल होइन। ये बेरा म उमन समारोह ल सम्बोधित करत कहिन कि स्वर्गीय श्री घनश्याम सिंह गुप्त महान स्वतंत्रता संग्राम सेनानी रहिन। देश के आजादी अऊ देश के निर्माण म अऊ संविधान निर्माण म उंखर बहुमूल्य योगदान रहिस। अइसन महापुरूष के सुरता म जयंती समारोह के आयोजन एक सराहनीय पहल हे।
मुख्यमंत्री श्री बघेल ह घनश्याम सिंह गुप्त स्मृति आयोजन समिति कोति ले छत्तीसगढ़ विधानसभा म ओखर तैल चित्र लगाय के मांग के समर्थन करत कहिन कि ओ मन एखर बर विधानसभा अध्यक्ष डॉ. चरणदास महंत ले ये संबंध म आग्रह करहीं। उमन कहिन कि नवा रायपुर के एक चौक के नामकरण स्वर्गीय श्री घनश्याम सिंह गुप्त के नाम म करे जाही अऊ उहां उंखर प्रतिमा घलोक स्थापित करे जाही। मुख्यमंत्री ह कहिन कि दुर्ग निवासी स्वर्गीय श्री घनश्याम सिंह गुप्त सीपीएंड बरार प्रांत के विधानसभा के पहिली अध्यक्ष घलोक रहिन।
मुख्यमंत्री ह समारोह म स्वर्गीय श्री घनश्याम सिंह गुप्त के व्यक्तित्व अऊ कृतित्व उपर प्रकाशित पुस्तक ’विधान पुरूष’ के विमोचन घलोक करिन। ये पुस्तक के लेखक श्री संजीव तिवारी हें। मुख्यमंत्री श्री बघेल ह पुस्तक के लेखक श्री तिवारी ल बधाई देवत कहिन कि उमन हमार पुरखा मन के सुरता करके उंखर स्मृति मन ल संजोए के सहराए के लईक उदीम करे हें। मुख्यमंत्री ह श्री संजीव तिवारी ल आयोजक मन कोति ले सम्मानित करत उंखर उज्जवल भविष्य बर शुभकामना दीन।
कार्यक्रम के अध्यक्षता करत पूर्व विधायक श्री प्रदीप चौबे ह कहिन कि मुख्यमंत्री श्री भूपेश बघेल के अगुवई म छत्तीसगढ़ी संस्कृति, सभ्यता अऊ तीज तिहार ल नवा जीवन देहे के काम बखूबी करे जात हे। हमार पुरखा मन के सम्मान बाढ़े हे अऊ छत्तीसगढ़ के स्वाभिमान ल बल मिले हे। उमन कहिन कि हमार मूर्धन्य पुरखा मन के स्मृति ल संजोए बर नवा रायपुर के चौक-चौराहा के नामकरण ऊंखर नाम म करे अऊ उहां पुरखा मन के मूर्ति स्थापित करे के सराहनीय निर्णय राज्य सरकार कोति ले लेहे गए हे।
ये बेरा म पूर्व विधायक श्रीमती प्रतिमा चंद्राकर, जिला पंचायत दुर्ग के अध्यक्ष श्रीमती शालिनी यादव, घनश्याम सिंह गुप्त स्मृति आयोजन समिति के अध्यक्ष श्री शंकर लाल ताम्रकार ह स्वागत भाषण दे। कार्यक्रम म आयोजन समिति के उपाध्यक्ष अऊ नगर पालिका निगम दुर्ग के सभापति श्री राजेश यादव, पूर्व पार्षद डॉ.राघवेन्द्र सिंह गुप्ता, सचिव श्री अशोक अग्रवाल, कोषाध्यक्ष श्री कमल नारायण रूंगटा, दुर्ग के पहिली महापौर श्री आर.एन.वर्मा संग श्री अश्वनी साहू, अखिलेश यादव, स्वर्गीय श्री घनश्याम सिंह गुप्त के परिवार के सदस्य अऊ नागरिक उपस्थित रहिन।