बटुराकछार स्कूल म बहार लहुटिस, युक्तियुक्तकरण ले 97 लइका मन ल मिलिस 4 गुरूजी

पालक मन म खुशी के लहर, लका मन के उज्जवल भविष्य के जागिस उम्मीद
रायगढ़, जिला के घरघोड़ा विकासखंड के दूरिहा म बसे गांव बटुराकछार के लइका मन ल अब बेहतर पढ़ाई के अवसर मिलइया हे। इहां के प्राथमिक स्कूल म पहिली सिरिफ एक गुरूजी ही रहिस, उहु कोनो दूसर स्कूल ले व्यवस्था के तहत पढ़ाए आत रहिस। फेर अब राज्य सरकार के युक्तियुक्तकरण प्रक्रिया के तहत ए स्कूल म 4 गुरूजी पदस्थ कर देहे गए हे।
ए स्कूल म 97 लइका पढ़थें। गुरूजी के कमी के सेती लइका मन के पढ़ई प्रभावित होवत रहिस। गांव के पालक इतवार दास महंत ह बताइस के ओखर बेटा टिकेश्वर दुसरी कक्षा म पढ़थे, फेर एके गुरूजी के भरोसा पूरा स्कूल चलत रहिस। वोकर बताती लइका मन के शुरुआती पढ़ाई के साल बहुत जरूरी होथे अऊ गुरूजी नइ होए ले ये समय बर्बाद होवत रहिस। अब गुरूजी के आए ले लइका मन के पढ़ई सुधरही। गांवे के शाखाराम राठिया ह घलोक गुरूजी मिले म खुशी जताईस। वो ह कहिस के ओखर बेटा तुलेश तीसरी कक्षा म हे अऊ गुरूजी के अनुपस्थिति ले पढ़ई म असर परत रहिस। पहिली एक गुरूजी के छुट्टी म जाय ले पूरा स्कूल बंद करना परत रहिस, फेर अब ये समस्या नइ रहय।
जिला के शिक्षा विभाग ह 3 अऊ 4 जून के युक्तियुक्तकरण के प्रक्रिया पूरा करे हे, जेखर से जिला के 21 अइसन स्कूल मन म गुरूजी भेजे गए हे, जिहां पहिली कोनो गुरूजी नइ रहिन। अधिकतर स्कूल दूरिहा के ग्रामीण इलाका मन म हे। अब इहां सरलग कक्षा लग सकही अऊ लइका मन के पढ़ई फेर पटरी म लहुटही। मुख्यमंत्री श्री विष्णुदेव साय के अगुवइ म होवत ए पहल ले पालक मन ल अपन लइका मन के भविष्य ल लेके एक नवा उम्मीद मिले हे। शिक्षा विभाग के ये कोसिस ग्रामीण क्षेत्र मन म शिक्षा के गुणवत्ता ल बेहतर बनाए के दिशा म बड़का कदम साबित होवत हे।